Eńbek jáne halyqty áleýmettik qorǵaý ministri Mádina Ábilqasymova ózine qatysty barlyq synnan qorytyndy shyǵaratynyn málim etti.
Úkimet otysyrynan shyqqan ministrge jýrnalister «qoǵamdaǵy narazylyqqa bailanysty otstavkaǵa ketesiz be?» dep saýal jaldady.
Alaida Mádina Ábilqasymova suraqqa jaltara jaýap berdi.
«Biz syndy estip turamyz. Eń bastysy, bul synnan qorytyndy shyǵaramyz. Jaǵdaidy barynsha jaqsartýǵa tyrysamyz. Júzege asyrylyp jatqan memlekettik saiasattyń tiimdiligin arttyrýǵa baǵyttalǵan sharalar qabyldanady, - dedi ol.
Osy oraida ministr QR Úkimetiniń janynan qurylǵan el azamattarynyń tabysyn arttyrý, turmys sapasyn jaqsartý, ári kópbalaly otbasylarǵa qoldaý sharalaryn kúsheitý jónindegi jumys toby aiasynda kópbalaly otbasylardy baspanamen qamtamasyz etý máselesi baqylaýda bolatynyn málim etti.
«Qazirgi ýaqytta jergilikti atqarýshy organdarmen birlesip, barlyq usynystardy jinaýdamyz. Indýstriia jáne infraqurylymdyq damý ministrligi sol arqyly arnaiy esebin shyǵarýda. Barlyq talaptardy jinap jatyrmyz. Atqarýshy organdarǵa ǵana emes bizdiń ministrlikke de kópbala analar kelip jatyr. Búgin de kezdesý bolady. Usynystardyń barlyǵyn jumys toby aiasynda sheshýge tyrysamyz», - dedi ol.
Aita keteiik, 4 aqpanda Astanadaǵy Kóktal turǵyn úi alabynda shaǵyn baspana órtenip, 5 bala kóz jumdy. Keiin áleýmettik jelide Eńbek jáne halyqty áleýmettik qorǵaý ministri Mádina Ábilqasymovanyń jumysyna qatysty syn aityldy.
Al Madina Ábilqasymovanyń ózi qaiǵydan qan jutyp otyrǵan otbasyǵa sol kúni baryp, kóńil aitqan eken, biraq aýyryp júrgendikten marqum qyzdardyń janazasyna qatyspapty. Tragediiadan keiingi alǵashqy túsiniktemeni onyń orynbasary Svetlana Jaqypova jariialaǵan bolatyn. Ministrlik basshysy 6 aqpan kúni de úkimet otyrysyna kelmedi.
Keiin ortalyq kommýnikatsiialar qyzmetindegi Madina Ábilqasymova qatysýy tiis brifing bastalar aldynda keiinge qaldyryldy.
