El óńirlerindegi mádeniet uiymdarynyń qyzmetkerleri meditsinalyq maska tigý aktsiiasyn bastap ketti, dep habarlaidy QazAqparat.
«Jumyla kóterip, talai júkti jeńildetkenbiz. Bul synaqtan da eldegi birlik pen kelisimniń arqasynda súrinbei óterimizge senemin. Qazir tutas jer-jahandy teńseltken koronavirýsqa qarsy naýqanǵa árkim qolynan kelgenshe úles qosyp jatyr. Bizdiń ministrlikke baǵynyshty bilim berý mekemeleriniń jataqhanalary indetpen kúreske bel sheship kirisken dárigerlerdiń, quqyq qorǵaý organy qyzmetkerleri men áskerilerdiń jumylǵan jumysyna tamshydai úles qosýda. Elimizdegi indetke qarsy kúresten biz de shet qalmadyq. Ministrlikke qarasty respýblikalyq mádeniet uiymdary 21-naýryzdan aýrýhanalarǵa, qalanyń áleýmettik mekemelerine jáne óz qyzmetkerleri úshin meditsinalyq maska tigý aktsiiasyn bastady», - dedi Mádeniet jáne sport ministri Aqtoty Raiymqulova OKQ-da ótken baspasóz máslihatynda.
Máselen, búgingi kúni mádeniet uiymdary óz kúshimen barlyq sanitarlyq-gigienalyq normalardy saqtai otyryp, 15 myńnan astam kóp ret qoldanylatyn maskany tiisti uiymdarǵa tapsyrǵan. Sonymen qatar, óńirlik mádeniet uiymdary da osy aktsiiaǵa qosylyp, 20 myńnan astam maska tikken.
«Sonymen qatar ministrlikte baǵynyshty uiymdar materialdyq jaǵdaiy tómen azamattarǵa azyq-túlik dári-dármek, materialdyq kómek kórsetip keledi. Búgingi brifingte sózimdi aq halatty abzal jandarǵa alǵys aitýdan bastadym. Qazir dárigerlerge aqyndarymyz óleń arnap, kompozitorlarymyz, tipti mamandyqtary ónerden alys adamdar da qoldap, óz týyndylaryn shyǵaryp jatqandyǵyn túrli aqparat quraldarynan, áleýmettik jelilerden estip, kórip júrsizder. Osy kúrdeli synaqty kezeńde elimiz aýyzbirshilik sabyrlyq arqasynda barlyq qiynshylyqtardan birge eńseretinimizge senimdimin!» - dedi ol.
