QR Jazýshylar odaǵy tóraǵasynyń orynbasary, aqyn Aqberen Elgezek elimizdegi ádebiettiń damýyndaǵy ózekti máseleler men birqatar usynystaryn aitty, dep habarlaidy QazAqparat.
«Birinshiden, qoldanystaǵy «Mádeniet týraly» zańda teatrlar men kitaphana týraly taraýlar bar, tipti kino salasynda arnaiy zań qabyldadyq. Onyń bári kerek, bári durys. Biraq osy teatr men kinonyń negizinde qandai dúnie jatyr? Ol árine ádebiet. Ádebiet bolmasa, kino men teatr qoiylymy qaidan shyqsyn? Kitaphana týraly taraý bar, biraq sol kitaphana sórelerinde ádebi kitaptar turǵan joq pa?», - dedi Aqberen Elgezek Mádeniet jáne sport ministrliginiń alqa otyrysynda.
Onyń aitýynsha, zańda kórkem ádebiet týraly naqty taraý joq. Ádebiet týraly janama qaralatyn sózder bar, biraq ol qandai ádebiet degen naqty uǵymdy anyqtamaidy.
«Mysaly qoǵamdyq mańyzdy ádebiet týraly taraý bar jáne ol taraýda ol ádebietti shyǵaryp basý men taratý týraly bulyńǵyr ereje bar. Al naqty kórkem ádebiet týraly taraý joq. Nege biz qazaqtyń kórkem ádebiet degen sózinen qashamyz, sony qalamgerler qaýymy túsinbeidi. Atalǵan zańda jazýshynyń mártebesi de anyqtalmaǵan. Shyǵarmashylyq qyzmetker degen sóz bar, biraq onyń qoǵamdyq orny men róli naqty aitylmaǵan. Bizdiń oiymyzsha, aldaǵy ýaqytta atalǵan zańda kórkem ádebiet týraly, jazýshynyń mártebesi men onyń gonorar joldaryn anyqtaityn erejeleri bar bólek taraý engizý qajet. Oǵan saiasi erik-jiger bar bolsa, osy taraýdy jasaqtaityn jumys tobyna qatysyp, kómektesýge daiarmyz», - dedi qalamger.
