2023 jylǵa deiin mádeniet jáne sport salasyndaǵy mektep pen kolledj pedagogteriniń jalaqysy jyl saiyn 25 paiyzǵa ulǵaiyp otyrady, dep habarlaidy QazAqparat.
«Mádeniet jáne sport qyzmetkerleriniń ál-aýqatyn arttyrý – bizdiń jumysymyzdyń negizgi baǵyttarynyń biri. Memleket basshysynyń Joldaýyn iske asyrý sheńberinde 2020 jyldyń 1 qańtarynan bastap mádeniet jáne óner uiymdary qyzmetkerleriniń jalaqysy respýblikalyq deńgeide 50%-ǵa, ol orta eseppen alǵanda 96 myńnan 139 myń teńgege deiin, óńirlerde 35%-ǵa, sáikesinshe 96 myńnan 126 myń teńgege deiin ósti. Jalpy, mundai ósim shamamen 34 myń adamdy qamtydy», - dedi Aqtoty Raiymqulova OKQ-da onlain rejimde halyq aldynda esep berý kezdesýinde.
Ministr sondai-aq, 2020 jyldyń basynan bastap kásiptik qyzmetin toqtatqan jáne kásibi eńbek ótili keminde 20 jyl bolatyn balet ártisterine ai saiyn sońǵy 3 jyldyq ortasha jalaqysynyń 60%-ǵa deiingi mólsherinde tólem berile bastaǵanyn jetkizdi.
«Budan basqa, Qazaqstandaǵy ádebiet jáne óner qairatkerlerine, talantty jastarǵa memlekettik qoldaýdy kúsheitý maqsatynda beriletin Tuńǵysh Prezident – Elbasynyń mádeniet salasyndaǵy stipendiiasy 240-tan 660 ailyq eseptik kórsetkishke deiin ulǵaityldy. Jyl saiyn ǵylym, mádeniet jáne óner salasyndaǵy daryndy jastar Qazaqstan Respýblikasynyń Tuńǵysh Prezidenti – Elbasy qory premiiasynyń laýreaty atanyp keledi. Erekshe mártebesi bar mádeniet jáne óner salasyndaǵy joǵary oqý oryndarynyń professor-oqytýshylar quramyna laýazymdyq jalaqylarynyń mólsherine 1,75 koeffitsienti saqtalǵan», - dedi ol.
Sonymen birge ministrdiń aitýynsha 2020 jylǵy 1 qańtardan bastap mádeniet jáne sport salasyndaǵy mamandandyrylǵan mektep jáne kolledj pedagogteriniń jalaqysy jyl saiyn 2023 jylǵa deiin 25 paiyzǵa ulǵaiyp otyrady. Naqtyraq aitqanda ol eńbekaqy 2020 jyly 25 paiyzǵa, 2021 jyly 50 paiyzǵa, 2022 jyly-75 paiyzǵa, 2023 jyly-100 paiyzǵa ósedi.
