Mádeniet jáne sport ministrligi qyzmetkerleri bir kúndik jalaqylaryn aýyr naýqasqa shaldyqqan sport jýrnalisi Galina Polevaiaǵa aýdaratyn boldy. Osy oraida ministr Arystanbek Muhamediuly belgili sport jýrnalisine el bolyp kómektesý qajettigin aitty, dep habarlaidy "Ult aqparat" vedomstvonyń baspasóz qyzmetine silteme jasap.
«Galina Polevaia - elimizde sport jýrnalistikasynyń damýyna zor úles qosqan tulǵa. Birneshe Olimpiada, Aziia oiyndaryna qatysyp, sportshylarymyzdyń jarqyn jeńisterin kógildir ekran arqyly elge jetkizgen Galinanyń endi ózi de jeńiske jetýi tiis. Men bári jaqsy bolatynyna senemin», - dedi ministr.
Aita ketsek, buǵan deiin QR Mádeniet jáne sport ministrligi Astana qalasynyń ákimdigimen birlesip, 6 qazan kúni saǵat 10.00-de «Stolichnyi» saiabaǵynda Galina Polevaiany qoldaý maqsatynda jeńil atletikalyq júgirý (erler -2,5 km, áielder - 1,5 km) qaiyrymdylyq sharasyn uiymdastyratynyn habarlaǵan bolatyn.
Esterińizde bolsa, biz jýrnalist Galina Polevaianyń aýyr naýqasqa shaldyǵyp, onyń otbasy halyqtan kómek suraǵanyn jazǵan bolatynbyz. Búgingi tańda Galinaǵa quny qymbat, shetelde jasalýy tiis ota qajet. Sheteldik emhana atalǵan otany 290 myń dollarǵa baǵalap otyr. Onyń otbasy úshin bul soma óte úlken. Barlyq turǵyndar men qala qonaqtary, BAQ ókilderi atalǵan sharaǵa belsene atsalysa alady. Jinalǵan qarajat jýrnalistiń otbasyna tabystalady.
