Elimizdegi «Ulttyq» mártebesi bar bes jetekshi mádeniet uiymy qyzmetkerleriniń eńbekaqysy 75%-ǵa artady. Bul týraly Mádeniet jáne sport ministri Dáýren Abaevtyń ministrlikke baǵynysty uiymdar ujymdarymen kezdesýi barysynda aityldy. Tiisti jobany QR MSM ázirlep, QR Úkimeti maquldady, dep habarlaidy "Ult aqparat" vedomstvonyń baspasóz qyzmetine silteme jasap.
Qazirgi tańda Muhtar Áýezov atyndaǵy Qazaq ulttyq drama teatry, Qurmanǵazy atyndaǵy Qazaq ulttyq halyq aspaptar orkestri, Abai atyndaǵy Qazaq ulttyq opera jáne balet teatry, Mihail Lermontov atyndaǵy Ulttyq orys drama teatry, sondai-aq Qazaqstan Respýblikasynyń Ulttyq kitaphanasy «ulttyq» mártebege ie. Endi osy uiymdar qyzmetkerleriniń laýazymdyq eńbekaqysyna jańa koeffitsient qoldanylatyn bolady. Mysaly, 7-10 jyldyq eńbek ótili bar artister qazir 217 129 teńge alady, al 1 shildeden bastap olardyń eńbekaqysy 379 977 teńgeni quraidy.
«Ózderińiz biletindei, Memleket basshysy elimizdiń mádenietin damytýǵa, sala qyzmetkerleri úshin qolaily jaǵdai jasaýǵa erekshe kóńil bóledi. Bul baǵytta ministrlik tarapynan da aýqymdy jumystar atqarylyp keledi. Eńbekaqyny kóterý-bul mańyzdy baǵyttardyń biri ǵana. Sonymen qatar, biz birqatar mádeniet nysandaryn qaita jańǵyrtyp, materialdyq-tehnikalyq bazany jaqsartý jáne qyzmetkerlerdiń biliktiligin arttyrý máselelerin qarastyramyz», – dedi Dáýren Abaev.
Almatyǵa sapary aiasynda ministr Natalia Sats atyndaǵy memlekettik akademiialyq orys balalar men jasóspirimder teatryna bardy, sondai-aq mádeniet salasynyń sarapshylarymen birqatar kezdesýler ótkizdi.
