Foto: 24tv.ua
19 qazan, jeksenbi kúni tańerteń Parijdegi Lývr murajaiyn belgisiz adamdar tonap ketti. Urylarǵa mýzeiden Napoleon Bonapartqa tiesili bolǵan zergerlik buiymdar men ózge de qymbat áshekeilerdi alyp shyǵýǵa nebári jeti minýt qajet bolǵan.
Prokýratýra «uiymdasqan urlyq» jáne «qylmys jasaý maqsatynda aldyn ala sóz bailasý» baby boiynsha tergeý bastady. Tergeý mádeni qundylyqtardyń zańsyz ainalymyna qarsy arnaiy qyzmettiń qoldaýymen júrgizilip jatyr.
«Qazir zalal mólsheri eseptelýde. Tergeý jalǵasýda», – dep habarlady prokýratýra.
Sońǵy málimet boiynsha, urlyqqa tórt adam qatysqan. Olar betterin tolyq jasyrǵan jáne oqiǵa ornynan skýterlermen qashyp ketken.
TF1 telearnasyna bergen suhbatynda Frantsiianyń mádeniet ministri Rashida Dati urlanǵan buiymdardyń bireýi mýzei mańynan tabylǵanyn habarlady. Onyń aitýynsha, zatty urylar qashý barysynda tastap ketken bolýy múmkin.
Frantsiianyń birneshe BAQ-y habarlaǵandai, tabylǵan zaqymdalǵan buiym – XIX ǵasyrdaǵy imperatritsa Evgeniiaǵa, iaǵni Frantsiiany basqarǵan Napoleon III-tiń jaryna tiesili táj. Lývr murajaiynyń saityndaǵy derekke súiensek, bul táj altyn búrkittermen bezendirilgen jáne 1354 brilliant pen 56 zúbárjatpen kómkerilgen.
Foto: ashyq derekkóz
Keshke qarai prokýratýra urlanǵan zattardyń tolyq tizimin jariialady.
Parij prokýrory Lora Bekiýo BFMTV arnasyna bergen suhbatynda, tizimde frantsýz monarhtaryna tiesili mynadai zergerlik buiymdar bar ekenin aitty:
-
Napoleon I-niń jubaiy Mariia-Lýiza kollektsiiasynan alqa men syrǵa;
-
Korol Lýi-Filipp I-niń áieli Mariia Amaliia men Napoleon III-tiń anasy Gortenziia Bogarnege tiesili bolǵan alqa, syrǵalar jáne diadema;
-
Imperatritsa Evgeniianyń eki tanamonshaǵy, korsaj banty jáne diademasy.
Napoleon III-tiń áieli Evgeniianyń diademasy
Frantsiia koroli Lýi-Filipptiń jubaiy Mariia Amaliia Neapolitanskaianyń alqasy
Rashida Dati urylar «kásibi túrde, eshqandai zorlyq-zombylyqsyz jáne abyrjýsyz áreket etkenin» atap ótti.
Murajai tańerteńnen bastap «erekshe sebepterge bailanysty» tolyq kúnge jabylǵan.
Frantsiianyń Ishki ister ministrligi keiin naqtylaǵandai, jergilikti ýaqytpen 09:30 shamasynda (Grinvich boiynsha 07:30) birneshe adam Apollo galereiasyna terezeni syndyryp kirgen. IIM basshysy Loran Nýnestiń aitýynsha, úsh-tórt ury ǵimarat syrtyna toqtatylǵan júk kóligindegi kótergish mehanizmdi paidalanǵan.
Ishke kirgen soń olar vitrinada turǵan zergerlik buiymdardy alyp, skýterlermen qashyp ketken. Nýnestiń aitýynsha, búkil operatsiia jeti minýtqa ǵana sozylǵan.
Ministrlik bul zattardyń tek kommertsiialyq turǵydan ǵana emes, tarihi jáne mádeni jaǵynan da ólsheýsiz qundy ekenin basa aitty.
Frantsiia IIM atap kórsetken Apollo galereiasynda frantsýz tájiniń saqtalǵan eń qundy áshekeileri qoiylǵan.
Uly Frantsýz revoliýtsiiasy kezinde monarhiia qulatylǵan soń, táj áshekeileriniń kóbi satylyp ketken nemese joǵalǵan. Degenmen murajaida Napoleon imperator atanǵan kezde jáne keiin onyń jieni – Napoleon III bilikke kelgende arnaiy satyp alynǵan birneshe buiym saqtalǵan. Olar sol kezeńdegi imperatritsalar – Mariia-Lýiza men Evgeniiaǵa da tiesili bolǵan.
Murajai saitynda aitylǵandai, galereiada qoiylǵan eń baǵaly eksponattar – ataqty Regent almasy, «Sansi» jáne «Gortenziia» atty gaýhartas.
Lývrda álemdegi eń ataqty óner týyndylarynyń kóbi saqtalǵan. Sonyń ishinde eń áigili eksponat – Leonardo da Vinchidiń «Mona Lizasy».
