Minskide Belarýs prezidenttigine úmitker Viktor Babarikonyń uly qamaýǵa alyndy. Ol qazirgi prezident Aleksandr Lýkashenkonyń sailaýdaǵy bas básekelesi sanalady. Edýard Babarikov te, onyń ákesi de izoliatorda qamalyp jatyr. Bilik istiń mán-jaiyn jariialamai otyr. Babarikonyń advokaty da eshqandai málimet taratpai otyr degen habar bar. Advokat muny aqparatty taratpaý týraly qujatqa qol qoiýymen túsindirgen.
Prezidenttikke úmitker Viktor Babarikonyń ózi 18 maýsymda qamalǵan bolatyn. Belarýs memlekettik baqylaý komiteti onyń “zańsyz áreket” jasaǵanyn aitty. Biraq qandai áreket ekenin naqtylamady. Odan bir apta buryn Babariko basqarǵan “Belgazprombanktiń” 15 burynǵy jáne qazirgi qyzmetkeri qamaýǵa alynǵan bolatyn. Lýkashenko muny Belarýstegi “Maidannyń” aldyn alý sharasy dep túsindirdi.
Viktor Babariko qamalǵan soń, Belarýste myńdaǵan adam narazylyq aktsiiasyna shyqty. Senbi kúni politsiia narazylyq aktsiiasyna qatysqan 270 adamdy ustap áketti.
Belarýste prezident sailaýy 9 tamyzǵa belgilengen. Eldi 1994 jyldan beri basqaryp kele jatqan Aleksandr Lýkashenko altynshy merzimge sailanbaq.
