17 tamyzda Belarýs prezidenti Aleksandr Lýkashenko ereýil ótkizip jatqan Minsk zaýytynyń jumysshylary (MZKT) aldyna shyǵyp, elde jańadan sailaý ótpeidi dep taǵy málimdedi. Bir aptadan astam ýaqyttan beri narazylyq aktsiiasyn ótkizip jatqandar Lýkashenkodan sailaýdy qaita ótkizýdi talap etedi. Belarýstegi prezident sailaýynyń qorytyndysyn Ulybritaniia, Polsha, Litva jáne Eýroodaqqa múshe ózge elder de moiyndamaǵan.
Lýkashenkomen kezdesý kezinde MZKT jumysshylary "Ket!" (Ýhodi) dep aiqailady. Al Lýkashenko "bul suraqqa jaýap bereiin: taǵy da aiqailasańyzdar bolady" dedi.
Osydan soń "qysymmen bir nárse jasaidy dep oilamańyzdar, men eshqashan ondaiǵa barmaimyn. Ólsem de, sailaý bolmaidy. Sebebi, MZKT da, MAZ da, BELAZ (traktor zaýyttary - red.) da qalmaidy, jarty jyl ishinde bári jabylady" dedi Lýkashenko.
Degenmen ol prezident ókiletin bólisýge daiar ekenin, biraq muny qysymmen nemese "kóshedegi narazylyqtan" keiin jasamaitynyn eskertti. Onyń sózine qaraǵanda bilik ókiletin úlestirý máselesin kóshe emes, "konstitýtsiialyq protsess" arqyly júzege asyrý kerek.
Lýkashenko zaýytqa tikushaqpen ushyp kelgen. MZKT jumysshylary TUT.by saityna prezidenttiń barlyq jumysshylarmen kezdespegenin, tek "tańdaýlylarmen" kezdeskenin habarlady.
Prezidenttiń tikushaǵy jerden kóterilip bara jatqan shaqta kezdesýge qatysa almai qalǵan jumysshylar ysqyryp, Lýkashenkoǵa qarsy urandar kótergen. "Nastoiashee vremia" arnasynyń habarlaýynsha, MZKT jaqqa qarai áskeri tehnika baǵyt alǵan. Olardyń zaýyt aýmaǵyna kirgeni-kirmegeni belgisiz.
17 tamyzdy birneshe zaýyt jalpyulttyq ereýil kúni dep jariialaǵan. Minskiden tikelei efirde habar taratyp jatqan "Nastoiashee vremia" arnasy jumysshylar men qarapaiym azamattardyń kóshede sherýletip bara jatqanyn kórsetti. "Oqiǵa jyldam damyp jatyr" dedi arna tilshisi.
Belarýste prezident sailaýy 9 tamyzda ótken. Ortalyq sailaý komissiiasy Lýkashenkonyń 80 paiyzdan astam daýys jinaǵanyn habarlaǵan. Prezident sailaýynyń resmi qorytyndysy jariialana bastaǵan ýaqyttan beri elde narazylyq aktsiialary ótip jatyr. Sailaý qorytyndysy burmalandy dep esepteitin narazylar elde qaita sailaý ótkizýdi jáne Lýkashenkonyń otstavkaǵa ketýin, kúshtik qurylymdardyń halyqqa kúsh qoldanbaýyn talap etip otyr.
