Dúniejúzilik densaýlyq saqtaý uiymy (DDSU) koronavirýs indetine bailanysty Belarýste karantin jariialap, komendanttyq saǵat engizý máselesin qarastyrýǵa keńes berdi. Bul týraly Bobrýiskide jumysshylarmen kezdesý kezinde Belarýs prezidenti Aleksandr Lýkashenko habarlady.
Prezident DDSU-ny "Minskige saiasi turǵyda ústirt qarady" dep aiyptap, jumysshylardy koronavirýs týraly resmi aqparatqa senýge shaqyrdy.
Bastapqyda Belarýs prezidenti koronavirýs indetin joqqa shyǵaryp, oqshaýlaý rejimin synǵa alǵan.
Sońǵy málimet boiynsha, Belarýste 6 myńnan astam adamnan koronavirýs tabylǵan. 50-den astam adam qaitys bolǵan. Biraq soǵan qaramastan Belarýs karantindik sharalar engizbegen jáne qoǵamdyq sharalarǵa tyiym salmaǵan Eýropadaǵy sanaýly memleketterdiń biri retinde qalyp otyr.
Buǵan deiin DDSU Belarýs biligin epidemiologiialyq ahýaldyń nasharlaýyna daiyn bolýǵa shaqyrǵan.
Qazir koronavirýs indetine bailanysty álemniń kóptegen elinde shekteý sharalary engizilgen. Qoǵamdyq sharalarǵa tyiym salynǵan, oqý oryndary jabylǵan. Alaida Eýropanyń birneshe elinde - Daniia, Avstriia, Ispaniia, Germaniiada shekteý sharalary jumsartyldy. AQSh-ta narazylyq aktsiialary ótip, turǵyndardyń jumysqa oralýyna ruqsat etýdi talap etti. Al DDSU karantindik sharalardy alýǵa asyqpaý qajettigin eskertip, indettiń "ekinshi tolqynyna" jol bermeýge shaqyrdy.
Dúniejúzilik densaýlyq saqtaý uiymy Qytaidan taraǵan bul virýsty "pandemiia" dep jariialaǵan. Koronavirýs jaily qańtardyń basynda belgili boldy. Ony alǵash juqtyrǵandar Qytaidyń Hýbei provintsiiasynyń Ýhan qalasynda tirkeldi. Virýs tynys alý jolyn zaqymdap, pnevmoniiany órshitedi. Bul derttiń kóbine egde adamdar men sozylmaly aýrýy bar adamdarǵa saldary aýyr bolýy múmkin.
