Elordanyń ákimi Baqyt Sultanov negizgi kapitalǵa salynǵan investitsiialardyń tómendeýine sebepshi faktorlardy atady, dep xabarlaidy QazAqparat tilshisi.
«Iá, investitsiialardyń kólemi eki esege tómendep otyr. Bunyń negizgi sebebi - qurylys salasyndaǵy kórsetkishterdiń tómendeýi. Qurylys jumystary 43 protsentke, al turǵyn úilerdi tapsyrý 35 protsentke tómendep otyr. Sebebi byltyr iri jobalar aiaqtalǵan bolatyn. Onyń ishinde Halyqaralyq qarjy ortalyǵyn ornalastyrý úshin EKSPO pavilondaryn rekonstrýktsiialaýǵa jumsalǵan 20 milliard teńge bar. Biyl ondai iri jobalar joq», - dedi B.Sultanov Úkimettiń búgingi otyrysynda.
Onyń aitýynsha, sońǵy eki jylda elordada 12 iri nysan paidalanýǵa berilse, biyl tek 4 iri joba ǵana qolǵa alynyp otyr.
«Biraq onyń ishinde LRT jelisiniń qurylysyn toqtata turýǵa bailanysty ol da óziniń áserin berip otyr. Qazirgi kezde biz Úkimet pen Ulttyq bankpen birge bul máseleni ishki kózderden qarjylandyrýdy pysyqtaýdamyz. Sonymen qatar, qalanyń investitsiialyq jobalaryn respýblikalyq biýdjetten qarjylandyrý kólemi 198 milliard teńgeden 115 milliard teńgege deiin tómendeýi de óz áserin berip otyr», - dep atap kórsetti B.Sultanov.
Sondai-aq, elorda ákimi qurylys jumystarynyń tómendeýine sebep bolǵan máselelerdi atady.
Ákimniń aitýynsha, jyl basynan beri 495 myń sharshy metr turǵyn úi paidalanýǵa berildi. Byltyr osy ýaqytta 763 myń sharshy metr salynǵan.
«Bunyń biraz obektivti sebepteri bar. Sebebi ótken jyldary qurylysshylar óz nysandaryn bos jerlerde salǵan bolatyn. Qazir jerdi saiajailardan bosatý jáne taǵy basqa jumystar kóp. Biyl Myńjyldyq alleiasyndaǵy barlyq saiajaidy buzamyz. Qazir jańa jerlerdi bosatyp, qurylys jumystaryn pysyqtap otyrmyz. Biz jyl sońyna deiin 1,7 million sharshy metr turǵyn úidi qosýdy josparlaǵan bolatynbyz. Biraq qosymsha jumystyń arqasynda shamamen 2 million sharshy metrdi paidalanýǵa beremiz degen jospar bar», - dedi onlain rejimde esep bergen Sultanov.
Aita keteiik, Úkimettiń búgingi otyrysynda QR Premer-Ministri Asqar Mamin negizgi kapitalǵa salynatyn investitsiialar boiynsha jumysty kúsheitýdi tapsyrdy. Sebebi birqatar aimaqtarda atalǵan kórsetkishter tómendep otyr. Olardyń ishinde Aqmola oblysy men Nur-Sultan qalasy bar.
«Negizgi kórsetkishter boiynsha birinshi toqsanda Shyǵys Qazaqstan, Atyraý, Qostanai, Pavlodar men Qyzylorda oblystary jaqsy nátijege jetti. Sonymen qatar, Aqmola oblysynda jáne elordada qurylys pen investitsiialar boiynsha kórsetkishter tómendep ketken. Osy baǵyttaǵy jumystardyń nashar deńgeide uiymdastyrylǵanyn atap ótemin», - dedi A.Mamin.
