Bul týraly Nur-Sultan qalasynyń ákimi Altai Kólginov Parlament kýlýarynda BAQ ókilderine málim etti, dep habarlaidy QazAqparat.
«LRT jumysy mine, qyrkúiek aiynda bastalady. Birinshi transhpen biýdjetten 20 mlrd teńge bólindi. Biraq ol jetkiliksiz. Sebebi eger tutastai alatyn bolsaq, qazirgi ýaqytta 1 mlrd dollarǵa jýyq qarajat jumsaldy. Onyń óz mindettemeleri bar. Sebebi Qytaimen kelisimsharttarǵa qol qoiylǵan. Ol jerde memlekettiń óziniń mindeti bar. Biz kelisimshartty buzatyn bolsaq, onda arbitrajda sottasyp, biz utylyp qalamyz», - dedi Altai Kólginov.
Ákimniń málimeti boiynsha, Qytai taraby óz mindettemelerin oryndap otyr. Qarajat toqtatylǵannan keiin jumys toqtap qalǵan.
«Qazir biz kóktemde, kúzde biýdjetten 3,5 mlrd teńge kóleminde bankterge protsentterimen qaitaryp otyrmyz. Báribir memlekettiń qaltasyna salmaq túsedi. Sondyqtan, biýdjetten bólemiz dep sheshim qabyldadyq. Qurylysty aiaqtaý úshin qazirgi eseppen 570 mln dollar kerek», - dedi astana ákimi.
