Foto: videodan skrinshot
Qazaqstan Qarjylyq monitoring agenttigi tanymal blogerler Janabylovtarǵa qatysty qylmystyq is qozǵady. Bul týraly agenttik tóraǵasynyń orynbasary Jeńis Elemesov Senatta ótken brifing barysynda málimdedi, dep habarlaidy Ult.kz.
«Qylmystyq kodekstiń 214-babynyń 1-bóligi boiynsha is qozǵaldy. Qazirgi ýaqytta tergeý bastaldy. Is keshe nemese aldyńǵy kúni tirkeldi. Olar elimizde júr», — dedi Elemesov.
Atalǵan bapqa sáikes, zań buzǵan tulǵalar 2000 ailyq eseptik kórsetkishke deiingi (shamamen 7,7 mln teńge) aiyppulmen, 600 saǵatqa deiingi qoǵamdyq jumystarmen nemese eki jylǵa deiin bas bostandyǵynan aiyrý ne shekteý jazasymen jazalanýy múmkin.
Sondai-aq Qarjy monitoringi agenttigi blogerler júrgizetin zańsyz onlain-lotereialarǵa qatysty qylmystyq jaýapkershilik engizý múmkindigin qarastyryp jatyr.
«Qazir bul másele boiynsha basqa memlekettik organdardyń usynystary jinalýda. Keiin Úkimet pen Májiliske shyǵaramyz. Biz buǵan deiin qarjy piramidalaryn jarnamalaǵany úshin qylmystyq jaýapkershilik engizdik. Munda da soǵan uqsas shara qarastyrylyp otyr», – dedi QMA tóraǵasynyń orynbasary Jeńis Elemesov.
Aita keteiik, Janabylovtar áleýmettik jelilerde 11 kólik oinatamyz dep jarnama jiberip, keiin tek 30 myń teńgege kýrs alǵandar arasynda ǵana utys oinatamyz dep málimdegen. Narazy bolǵan jurt blogerlerdiń ústinen aryz jazdy.
