Foto:depositphotos.com
AQSh-tyń Los-Andjeles politsiiasy orman órtterine sebepshi boldy degen kúdikpen bir adamdy ustady. Bul týraly “NewsNation” telearnasyna silteme jasap, Ult.kz habarlaidy.
"Los-Andjeles politsiia departamenti “NewsNation” telearnasyna “Kennet” órtin tergeý endi qasaqana órt qoiý isi retinde qarastyrylyp jatqanyn jáne bir adamnyń qamaýǵa alynǵanyn rastady", – delingen habarlamada.
Habarda, kúdiktini ustaýǵa jergilikti turǵyndar kómekteskeni aitylǵan. Okrýg prokýrory Neitan Hohmannyń málimetinshe, kináli dep tanylǵan adam ómir boiy bas bostandyǵynan aiyrylýy múmkin.
Apta ortasynda Los-Andjelesti qamtyǵan órtter, óńir tarihyndaǵy eń joiqyn apattardyń biri retinde baǵalanýda. Mysaly, Altadena aýdanynda 10 myń gektardan astam jer órtenip, 13 myń ǵimaratqa qaýip tónýde. Jaǵdaidy qatty jel ýshyqtyryp otyr, bul aviatsiiany qoldanýǵa kedergi keltirse, Paliseids aýdanyndaǵy órt gidranttary isten shyqqan. Myńdaǵan úi órt qorshaýynda qalǵan.
Sońǵy málimetterge qaraǵanda, apat qurbandarynyń sany keminde 10 adamdy quraidy. Los-Andjeleste myńdaǵan turǵyndy májbúrli evakýatsiialaý týraly buiryqtar berildi. Sonymen qatar, okrýgtiń órt sóndirý qyzmeti basshysy qolda bar resýrstardyń tek bir nemese eki iri órtpen kúresýge ǵana jetetinin moiyndady.
Aita keteiik, 5 dúrkin Olimpiada chempiony Garri Holl-Jýnior Los-Andjelestegi tabiǵi apat kezinde úii men medaldarynan aiyrylǵanyn habarlanǵan. Sonymen qatar, orman órtteri saldarynan Gollivýd akterleri Entoni Hopkins, Adam Brodi, Anna Feris jáne basqa da tanymal adamdar úilerinen aiyrylǵan.
.jpg)
