Qazaqstanǵa Frantsiia mádeniettanýshylary men tarihshylary úlken qyzyǵýshylyq tanytyp otyr. Bul týraly Elbasy kitaphanasyna kelgen Qazaqstan Respýblikasyndaǵy Frantsiia elshiliginiń mádeniet jáne seriktestik máseleleri boiynsha keńesshisi Lor Kasten málimdedi, dep habarlaidy "Ult aqparat".
Kasten hanym qazaq memlekettiginiń tarihyn, ásirese HIH-HH ǵasyrlar kezeńin erekshe qyzyǵýshylyqpen oqyp jatqanyn atap ótti.
«Qazaqstanǵa alǵash kelýim. Bes aidan beri eki el arasyndaǵy mádeniet jáne seriktestik máseleleri boiynsha jumys istep jatyrmyn. Búgin sáni jarasqan Nazarbaev ortalyǵynda bolyp, memlekettiń tarihyna súńgip ketkendei kúi keshtim. Elbasy kitaphanasynda Qazaqstan Prezidenti Nursultan Nazarbaevtyń marapattar ekspozitsiiasy erekshe áser etti. Bul jerdi asyqpai, ár eksponattyń qyzyqty tarihyna úńile otyra aralaý kerek», - dedi Lor Kasten.
Sonymen qatar, Frantsiia ókili búginde eki el arasyndaǵy iskerlik jáne mádeni bailanystar óte joǵary deńgeide ekenin, alaida ony, ásirese, bilim men týrizm salasynda tereńdete túsý kerektigin atap ótti.
«Týystarym men dostaryma Qazaqstan týraly aitqanda, eń birinshi aýyzǵa iligetini - qazaq halqynyń sheksiz qonaqjailyǵy, qonaq kúte alýy, jaidary minezi men keńpeiildigi. Onymen qosa, men úshin Qazaqstan men Abai uǵymdary - egiz. Onyń shyǵarmalary ómirlik filosofiiasynyń tereńdigimen janyńdy baýrap alady. Ár kesh saiyn dostaryma Qazaqstan týraly fotosýretter jiberemin. Bul kez kelgen halyqtyń dástúri men mádenietin keń tanytyp, pash etýdiń eń bir jyldam tásili dese de bolady. Buǵan tym áýestenip ketkenim sondai, jibergen sýretter men aitqan málimetterden keiin týystarym men dostarym Qazaqstandy qatty kórgisi keledi», - deidi Kasten hanym.
