M.Áýezov atyndaǵy Qazaq Memlekettik akademiialyq drama teatry 1-8 qazan aralyǵynda Ulybritaniianyń astanasy London qalasynda ótken III Qazaqstan óneriniń festivalinde D.Isabekovtiń «Jaýjúrek» dramasyn sahnalady.
Jazýshy, dramatýrg Dýlat Isabekovtiń 75 jyldyǵyna orai uiymdastyrylǵan festivalde teatr ujymy qazaqtyń balýany, ánshi-kompozitor, seri, halyq arasynda Balýan Sholaq atanǵan Nurmaǵanbet Baimyrzaulynyń ómirinen syr shertetin qoiylymmen jinalǵan qaýymnyń júregin jaýlady.
Bir ǵana jazýshynyń emes, qolyna qalam ustaǵan kúlli qazaqtyń abyroiyn asqaqtatqan bul festival, Elbasy aitqan «Rýhani jańǵyrýdyń» alpaýyt memleketterdegi ásem kórinisiniń biri.
QR Mádeniet jáne sport ministrliginiń qoldaýymen ótken bul is-sharada Qazaq eliniń mereiin ústem etken «Jaýjúrek» búgin elge oraldy.
"Bul teatr ujymynyń jaqsy jańalyqtarynyń biri ǵana. Aldaǵy kúnderi de shyǵarmashylyq tabystarymyz ben qýanyshty habarlarymyzdy sizdermen bólisip otyramyz, qadirli kórermen", - deidi teatrdyń baspasóz qyzmeti.
