M.Áýezov atyndaǵy Qazaq Memlekettik akademiialyq drama teatrynda sahnalanyp júrgen «Jaýjúrek» spektakli London tórinde jazýshy-dramatýrg D.Isabekovtiń 75 jyldyq mereitoi qarsańynda III Qazaqstan óneriniń festivalinde saltanat qurdy.
Elimizde ótken aýqymdy, mańyzdy jobalardyń biri – «Ekspo -2017» Halyqaralyq mamandandyrylǵan kórmesiniń mádeni baǵdarlamasy aiasynda kóptegen is-sharalardyń atqarylǵandyǵy barshamyzǵa belgili. Ártúrli baǵytta ótken teatr jáne kino festivalderi, árqandai kontsertter men kórmeler qazaqstandyqtar men sheteldik qonaqtarǵa erekshe áser qaldyrsa, óz salasynyń mamandary úshin tájiribe almasý mektebi boldy. «Ekspo-2017» kórmesi negizinde ótken mádeni jáne sporttyq sharalardyń joǵary deńgeide uiymdastyrylýy – QR Mádeniet jáne sport ministrliginiń qajyrly eńbeginiń jemisi. Halyqaralyq kórmeniń Ulybritaniia pavilonynda ótken aǵylshyn tilindegi shyǵarmalardyń tusaýkeserinde jazýshy-dramatýrg Dýlat Isabekovtiń shyǵarmalaryn alys-jaqyn shetelden kelgen meimandar joǵary baǵalaǵan bolatyn. Osy tusaýkeserde quttyqtaý sózin sóilegen QR Mádeniet jáne sport ministri Arystanbek Muhamediuly Ulybritaniia men Qazaq eliniń mádeniet pen ádebiet salasyndaǵy bailanystyń artqanyn aityp, jazýshyǵa aq tilegin arnaǵan bolatyn. Eki el arasyndaǵy dostastyq kezdesýi, búginde Ulybritaniiada óz jalǵasyn taýyp, qazaq qalamgeriniń abyroiyn shetelde asqaqtatyp otyr. Bul bir ǵana jazýshynyń emes, qolyna qalam ustaǵan kúlli qazaqtyń abyroiy. Munyń barlyǵy Elbasy aitqan «rýhani jańǵyrýdyń» alpaýyt memleketterdegi ásem kórinisi.
Angliia parlamentiniń joǵarǵy Lordtar palatasyndaǵy Dýlat Isabekovpen kezdesý óte áserli boldy.
QR Mádeniet jáne sport ministrliginiń osy keleli is-sharany moinyna alyp, qazaq teatr óneriniń álem sahnasynda saltanat qurýyna atsalysýy – ult rýhaniiatynyń álemdik keńistikte erkin kósilýine óz septigin tigizdi.
Gúlziia Sádýaqas
