QR IIM basshysy Qalmuhambet Qasymov lombardtardyń jumysyna qatysty tyń aqparattarmen bólisti, dep habarlaidy "Ult aqparat".
«Qylmystarǵa, onyń ishinde uialy telefondarǵa qatysty problemalar bar. Tek qana Almatynyń ózinde 4500 telefon urlaý deregi tirkeldi. Nelikten? Sebebi bazardyń ana buryshynda turyp telefon urlap, kelesi buryshynda ony saýdaǵa ainaldyrady. Bizdiń operatorlar týra sol kezde esepke qoiady. Bul Eýropa da múmkin emes dúnie. Al bizde múmkin... Sol sebepti, bizde telefon urlaýmen ainalysatyndarǵa jol ashyq», - dedi ministr Almatyda ótken Qazaqstan Respýblikasy men Resei Federatsiiasy ishki ister ministrligi áriptestiginiń tórtinshi otyrysy boiynsha ótken brifingte.
Ministr 2019 jyldyń 1 qańtarynan bastap azamattardyń barlyǵy telefondaryn JSN arqyly tirkeýge mindetteletindigi týraly aitty. Osynyń arqasynda uialy telefon urlyǵy azaiýy tiis. Búginde uialy telefon urlaý barlyq jasalatyn qylmystyń 15-20 % quraidy.
«Lombardtar bizde eshbir zańdy negizsiz jumys istep kelgen. 1997 jyly Ulttyq bank olardyń jumystaryna qatysty qaýly qabyldaǵan. Bul qujat qazir eskirdi. Bylaisha aitqanda, lombardtar urlanǵan múlikti satý ornyna ainaldy. Urlyq jasap, múlikti lombardta ótkizip jiberýge bolady. Bul basqa elderde múmkin emes dúnie. Biz Resei, Germaniia, Ózbekstan elderiniń tájiribelerin qaradyq. Sondyqtan tiisti zańǵa ózgertýler engizdik. Mamyrda qabyldanǵan Zańǵa sáikes QR UEM Lombardtar týraly qaýly daiyndap jatyr. Endi lombardtar múlik ótkizetinderdi sýretke túsiretin bolady. Osylaisha biz múlikti zańdylyǵyn tekseremiz. Bolashaqta qylmyskerler lombardqa urlanǵan zat ótkizbeitin bolady», - dedi Qalmuhambet Qasymov.
