Memleket basshysy Qasym-Jomart Toqaev Livan Respýblikasynyń Prezidenti Mishel Aýnmen telefon arqyly sóilesti, dep habarlaidy "Ult aqparat" qordanyń baspasóz qyzmetine silteme jasap.
Qasym-Jomart Toqaev Beirýt portyndaǵy jarylys saldarynan qaza tapqan adamdardyń jaqyndary men týystaryna kóńil aityp, zardap shekkenderdiń tezirek saýyǵyp ketýine tilektestik bildirdi.
Jarylys kezinde Qazaqstannyń diplomatiialyq ókildiginiń ǵimaraty búlinip, bir qyzmetkerdiń jeńil jaraqat alýyna bailanysty Qasym-Jomart Toqaev Mishel Aýnǵa Beirýtte júrgen Qazaqstan azamattarynyń (200-den astam) qaýipsizdigin qamtamasyz etýdi surady.
Memleket basshysy Livannyń ońtústiginde BUU Ýaqytsha kúshteriniń quramynda qazaqstandyq 120 bitimger sarbazdyń óz mindetterin laiyqty ári joǵary deńgeide atqaryp jatqanyn atap ótti. Osy oraida Qasym-Jomart Toqaev Livan úkimeti qazaqstandyq áskeri qyzmetshilerdiń aýysýy kezinde olardyń qaýipsizdigin saqtaý úshin qajetti kómek kórsetetinine senim bildirdi.
Áńgimelesý barysynda taraptar Qazaqstan men Livan arasyndaǵy qarym-qatynastardy odan ári keńeitý máseleleri boiynsha pikir almasty. Qasym-Jomart Toqaevtyń pikirinshe, Livan Qazaqstannyń Taiaý Shyǵystaǵy mańyzdy seriktesi jáne eki eldiń yntymaqtastyǵyna basa mán beriledi.
Óz kezeginde Mishel Aýn Qasym-Jomart Toqaevqa osyndai qiyn-qystaý kezeńde telefon shalyp, qoldaý kórsetkeni úshin rizashylyǵyn bildirip, onyń jyly lebizin Livan halqyna jetkizetinin aitty. Sondai-aq Livan biligi Qazaqstan azamattary men diplomattarynyń qaýipsizdigin qamtamasyz etý úshin barlyq qajetti sharalardy qabyldaitynyn jetkizdi.
Livan Prezidenti Qazaqstanmen aradaǵy ekijaqty jáne kópjaqty formattaǵy is-qimyldardy odan ári nyǵaitý maqsatynda birlese tyǵyz jumys isteýge múddeli ekenin naqtylady.
Sonymen qatar Mishel Aýn Qazaqstannyń BUU mandaty aiasyndaǵy bitimgershilik qyzmetin joǵary baǵalap, elimizdiń óńirlik jáne jahandyq qaýipsizdikti qamtamasyz etýdegi rólin atap ótti.
