Litvada koronavirýs infektsiiasynyń taralýyna bailanysty qaitadan jalpyulttyq karantin engizildi. Bul rejim resmi túrde senbi kúni kúshine enip, kem degende úsh aptaǵa sozylady. Odan keiin el úkimeti ári qarai sheshim qabyldaý úshin jaǵdaidy baǵalaidy, dep habarlaidy TASS agenttigi.
Endigi shekteý buǵan deiin naýryz aiynyń ortasynan maýsymnyń ortasyna deiin engizilgen shekteýge qaraǵanda qatań bolmaidy. Ol kezde eldegi tirshilik toqtap qalǵan bolǵan. Dárihanalar men saýda ortalyqtarynan basqa barlyq oryn jabylǵan.
Alaida endi adamdar qoǵamdyq jerde únemi maska taǵyp júrýge mindetti bolady. Barlyq buqaralyq shara toqtatyldy. Murajai, teatr, kinoteatr, ózge de mádeni mekemeler jabyldy. Dámhanalar men meiramhanalar endi tamaqty tek jetkizip berýmen shekteledi. Dúkender men qyzmet kórsetý kásiporyndary klientterdi 10 sharshy metrge bir adamnan ǵana qabyldaidy. Is júzinde bul onda qyzmetkerlerden basqa tek bir klient bola alatynyn bildiredi. Sondai-aq, jinalatyn adamnyń sany besten aspaýy tiis.
Litva prezidenti janyndaǵy koronavirýs boiynsha sarapshylar keńesiniń quramyna kiretin Litva eliniń densaýlyq saqtaý ǵylymdary ýniversitetiniń professory Mindaýgas Stankýnastyń juma kúni atap ótýinshe, karantinsiz elde aýrý juqtyrǵandar sany Rojdestvo merekesine qarai shamamen 100 myń adamǵa deiin kóbeiip ketetin edi. Qazirgi kezde bul kórsetkish 20,7 adamǵa jetken. Sarapshynyń atap ótýinshe, karantin jaǵdaiy turaqtandyrýǵa kómektesýi tiis.
«Bizdiń baǵalaýymyz boiynsha, 20 qarashadan nemese oqiǵalardyń damýynyń basqa nusqasyna sáikes, 27-nen bastap elde aýrý juqtyrý oqiǵalary azaia túsedi», - dedi ol tilshilerge.
Qazan aiynyń basynda Litvada táýlik ishinde koronavirýs juqtyrǵan adamdyń sany 100-ge jetpeitin, al 10 qazanda bul kórsetkish 200 adamnan asqan. 31 qazanda pandemiia bastalǵaly bir táýlik ishinde aýrý juqtyrǵan adamdardyń eń kóp sany – 1 001 oqiǵa tirkelgen. Juma kúni ol 1 656 oqiǵaǵa deiin kóbeidi.
Litvada alǵashqy adam 28 aqpanda koronavirýs juqtyrǵan. Elde qaýipti virýstan 192 adam qaitys boldy, aýrý juqtyrǵan 5 454 adam jazylyp shyqqan. Respýblikada osy ýaqytqa deiin 20 747 naýqas anyqtaldy. 38,2 myń adam ózin-ózi oqshaýlaý rejiminde.
