Lira Qonys alǵashqy áńgimelerimen-aq oqyrmandardy eleń etkizdi. «Máńgilik saǵynysh» atty alǵashqy kitabyn qoldan-qolǵa ótkizip oqyp júrgen jastardyń «Qulpynai qosylǵan balmuzdaq» kitaby shyqqan kezde Liraǵa degen qurmeti arta tústi. Oǵan sol jyldary filfaktyń stýdenti bolǵan biz kýámiz. Biraq osy kitaptan soń Liranyń esimi ádebi ortadan kórinbei ketti. Áńgime-novellalary jaryqqa shyqpai qoidy. Sóitsek, jazýshy muhit asyp qonys aýdarǵan eken. Áleýmettik jeli arqyly sóilesip, onyń jańa shyǵarmalaryn surap edik, «Aq jelkenge» kezinde kóp shyqtym ǵoi» dep rizashylyq bildirip, oqyrmandarymyzǵa jańa áńgimesin usyndy. Sheteldegi qazaq jazýshysynyń tyń dúniesin oqyp kórelik.
Kaliforniiadan Niý-Iorkke qonys aýdarǵan kúni-aq jumys izdeýdi bastadym. Bul shaharǵa baqytsyz elderden, joǵalǵan jurttan, aty joq araldardan baǵyn izdep bas suqqan barshanyń ótkenindei tyrmysqan aptalardan soń jergilikti mýzeilerdi basqaratyn kompaniianyń antropologiialyq bólimine qyzmetker kerek bola qalǵany. Ámiianymnyń jumyryna juq bolmaityn tiynyn estip qomsynǵanymmen, múshkil hálim tańdaý jasatpaityn. Mine, Patagoniia arýyn osy jolda kezdestirdim.
Ómir jomart emes dep kim aitady? Óz bátińkemniń baýyn ózim basyp ketip qulaǵan kúngi kóńilsizdigime onyń ne qatysy bar, keýildense bir kárzeńke túimedaǵy gúlin ústińe aýdara salatyn salty emes pe, antropologiialyq bólimniń Amerikanyń ulttyq tarihi mýzeiiniń ekinshi qabatynda ornalasqanyn estigende ushyp kete jazdadym. Ertesi kúni tańda metro beketine túsip kele jatyp, ózime tanys sátsizdikti ushyrattym. Ol buryshta qyzǵanyshtan kúiinip, qoly qaltyrap temeki shegip tur eken. Qarańyzshy, arzandaý bátińke kise de saý, uzyn aiaqtarym bar, bilegimde qymbat áshekei jarqyramasa da myqty qolym bar, tańmen talasyp Kýinstegi aialdamadan poiyzǵa otyramyn da, jolaýshylarmen kúlimsirep esendesemin, keibirine «kúnińiz jaqsy ótsin!» dep sáttilik tileimin. Qulaǵymda sharshamas shabyt syilaityn EXO ánderi oinaidy, súiikti Kaidyń partiiasyn onymen birge qosyla shyrqaimyn:
Don't be afraid
Love is the way
You can call me monster.
Sodan soń Ortalyq saiabaqtyń tap jelkesindegi aialdamadan shyǵyp, mańaiyna týrist toltyrǵan mýzeige betteimin. Al, sol kezde qýanyshtan jylaǵym keledi. Aziianyń bir túkpirinde ótken balalyq shaǵymdy esime alamyn, ymyrtta ájem pisirgen kespege toiyp alǵan soń maishamnyń jaryǵymen kitap oqityn júdeý keshterdi oilaimyn, júnnen toqylǵan jamaýly shulyǵymdy, ápkelerimnen qalǵan ebedeisiz uzyn kóilekterimdi jáne boiymmen birdei aýyr qapshyq arqalap maqtaly alqapta júrgen ózimdi kóremin. Mundaida kóshedegi beitanystyń bárin toqtatyp, «Qarashy, men sol maqtaly alqapta ómir boiy qalyp ketpedim, qazir bala kezde ózim sýretin jýrnaldan ǵana kórgen mynaý mýzeide jumys isteimin!» – dep aiǵai salǵym keledi. Keide qymsynbastan eńirep jylap alamyn da, áriptesterim ańǵaryp, bári durys pa dese, «kózime shań túsip edi» dep ótirik aitamyn. Ózimniń ne qara jer betinde, ne aq bulttyń ústinde ekenimdi uǵyp bolmas, kúlgin tústi tozań arasyndaǵy sátten shyǵyp, ainalama baiyptap qaraǵanymda meniń munda jumys atqarǵanyma týra bir ai bolǵan eken.
Bólimde nebári alty adam jumys isteidi. Terezesi Kalýmbýs dańǵylyna qaraǵan keń bólmeni aǵash jaqtaýshalarmen aiadai etip kesip, sol altaýǵa jeke otaý tikken, odan ári qujattar men kitaptar salynǵan sóreler jalǵasady. Ári qarai aq jamylǵy men tumyldyryq kiip qana kirýge bolatyn zertteý bólimi, ol jaqqa tumsyq suǵýǵa zaýqym joq, áldebir qorymnan tabylǵan súiekter men qumyralar taqyryby meni qyzyqtyrmaidy, ári ǵylymi qorytyndylardy jariialaý mindetin atqaratyn mamanǵa ol jaqta kólbeńdep júrý ábes te. Bólimdi Málisa Hárison esimdi elýdi eńsergen áiel basqarady. Boi-soiyn Almaniiadan aýǵan ata-babasynan alǵan at jaqty, piste muryndy, eýropalyq didarly, gavailyq ájesinen qysyńqy qoi kózderin básirelegen shiraq ta sýyq áiel. Ómiriniń on jylyn ǵylymda «Patagoniia arýy» degen atpen belgili, al, qyzmetkerler ózara «Uiqydaǵy sulý» dep ataityn Latyn Amerikasynan tabylǵan mýmiiany zertteýge arnaǵan. Bastapqy mamandyǵy lingvist, Argentina, Chili dalasyn meken etetin úndisterdiń Araýkan tilin, onyń ishinde Mapýdangý dialektisin zertteidi.
Jumysqa kirisken alǵashqy aptalarda men «Patagoniia arýyna» nazar aýdarmadym. Arý dep ardaqtaityn nesi bar, arheologtardyń kóp oljasynyń biri. Ary-beri ótkende jái músinge balaýshy em. Qalai bolǵanda da qatyp-semgen mýmiiany eki júz jyl buryn ómir súrgen ádemi boijetken edi dep qabyldaý ońai emes. Onyń Áiel turyqty bolǵanyn Patagoniianyń sýyq jeliniń arqasynda bútin saqtalǵan músheleri aiqyndaityn. Uzyn kirpikteri, jartysy jidip túsken qasy, tútilgen bir shýda qolań shashyna qarap onyń bir kezdegi kelbetin elestetetinmin. Ústinde aq gúlder kestelengen keń etekti qyzyl kóilegi boldy. Muny professor Hárison toi kóilegi dep túsindiretin. Topshylaýymda bul qalyńdyq kiimi emes, bul kóilekten men eýropalyq vintaj izin tanimyn. Bul ispan mádenietiniń osy qurlyqqa ornyǵa bastaǵan kezine tán sánniń ózgeriske ushyraýy. Bálkim qyz balany – onyń eń baqytty nekelesý kúni kóz jumdy degen jamanatqa qimaiyn ba, áiteýir qazir tamtyǵy qalǵan qyzyl kiimdi neke kóilegi edi deýge úzildi-kesildi qarsymyn. Iyǵyna juldyzdar men jarty ai beinelengen teńbil kórpe jamylǵan. Ondaǵy aspan deneleri úndisterdiń táńiriligin tanytady. Ispan mádenieti joidasyz jaýlasa da úndis keńistigin qolóner áli umytpaǵan. Alqymynda aq kúmisten soqqan teńgeli, qońyraýly bes qatparly omyraý-tana, mańdaiyna shubyrtpaly-úzbeli monshaq ilgen. Munyń bári bul boijetkenniń músin emes, jer atmosferasyn qamtityn tabiǵi gazdardyń arqasynda ómir súrgen biz sekildi kóp paqyrdyń biri ekenine sendiretin.
Bul kezde qarasha qazdar qaityp, jeltoqsan jetken. Qystyń kúni bir tutam, arqan boiy kóteriledi de, ile dóńgelenip uiasyna qonady. Jumys ýaqyty tuǵyrlanamyn degenshe aqsham túsip, sany samsaǵan ǵimarattaǵy únsizdikten elegizimin. Ár buryshtan úreidiń qulaǵy qalqaiǵanda álgi bir Ben Stiller somdaityn kinony kórgenim beker boldy dep oilaimyn. Alaqanyńnan keler kúnińdi oqityn eltimin, bolashaǵyńdy boljar qushynashpyn degenderdi aitpaimyn, ár adam ózine kóripkel, bul belgiler sol kúnderi kóńilim alaburtyp, meni kútken bir qubylystyń kele jatqanyn ańǵartatyn.
Sol kúni qas qaraisa da, áldebir qujatty qabyldaýy tiis qyzmetkerdi kútip kidire berdim. Mólsherimde ol sútpisirim ýaqytta jetýi tiis edi. Áriptesterim túgel jónin tapqan, abadan terezelerden qyzyl-jasyl jaryqtan táj kigen qalanyń ymyrttaǵy dúrmegi estiledi. Shári áli kóz ilmegen, úrei ataýly ai aýa andyzdamai ma, qazir olardyń sandalyp júretin shaǵy emes dep sybyrladym, osy kúbirdiń ózi maǵan tónip turǵan qorqynyshty aiqyndaityn. Ásilinde uiatpen jiti jumys isteitin jan emespin, jetip bolmaǵan qyzmetkerdi tospai-aq taiyp turar em, biraq eńsemdi bir kúsh basyp tyrp etkizbedi. Sómkemdi qajetsiz ashyp, japtym, tartpalarǵa da maǵynasyz úńildim, múmkin qazir bárin tastap, birinshi qabatqa qarai júgirýim kerek shyǵar? Sumdyq qorqynyshtyń qursaýynda ony kútkenim anyq.
Áne, esik ashyldy. Bul men kútken qyzmetker emes. Baiaý basyp jaqyndady. Sosyn, ispan tilinde Sálem degen daýysty anyq estidim.
– Hola.
– Ótinem... meniń janymdaǵy oryndyqqa otyryńyz. Qonaq qabyldaýǵa daiyn emespin, maǵan kórinbegenińiz durys.
– Esta bien, no te preocupes.
Bireýdiń jaiǵasqanyn jelkemmen sezdim. Sybdyryn qulaq estip, kóz kórkin kórmese de, janyńda bireýdiń bar ekenin uqtyratyn shoshymaly sezim. Álgi Ben Still oinaityn kinony beker qaradym, endi munyń bárin qiialym oilap tapty, ispansha sóilegen eshkim emes, ol júregimniń tarsyly dedim. Sóitip aldarqatýdyń ne keregi bar dedi ekinshi oiym: bul bólimdegi alty qyzmetkerdiń arasynda Hárison hanymnan basqa eshkim ispansha bilmeidi. Sol mezette osy qorqynyshty eshqashan umytpai, ózimmen birge ómir boiy alyp júretinimdi túsindim.
– Bul kim? – dedim.
– Quin es por alla? Onyń kim ekenin suradym. Tilim buralyp, gy-gy, po po degendei dybys shyqty. Tek, ekinshi qaitalaǵanda anyq daýystaǵan siiaqtymyn.
– Bul men...
Kózimniń qiyǵy aq gúlderi bar qyzyl kóilektiń etegin shaldy. Jotama jaiǵasqannyń kim ekenin sezetin siiaqtymyn. Tap qazir shyndyqty tańdasam jyndanyp keterimdi sezemin, amaly – moiyndamaý, bul óz qiialymnan óngen eles dep seskenbeý. Áitse de ózim kútken qyzmetker qashan jetpek dep úmit-ilgegim sol beitanys bireý bolǵany ras.
– Senimen áńgimeleskim keldi, – dedi qyzyl etekti. – Osynda ár táýlik saiyn álemniń túkpir-túkpirinen týrister keledi. Men óz denemmen olarǵa páni jalǵannyń ótkinshiligin túsindiretin beine bir qural siiaqtymyn.
– Bul jaman emes qoi? Iá, qandai jolmen bolsyn bireýge paidań tigeni jaqsy-aq, – dedim qorǵanshaq daýyspen. Álgi ár qadamyn sanap kele jatqan qyzmetkerdiń jaibasarlyǵyna kúiindim.
– Qalai oilaisyń, sen úshin ómirdiń máni ne? – dedi ol.
– Óziń armandaǵan isterdi jasap qalý shyǵar... Sońǵy demińdi alarda júrip ótken jolyńa qarap ókinbeseń, ózińe-óziń riza bolsań jetkilikti emes pe?
– Durys aitasyń.
Qujatty qabyldaýy tiis qyzmetker eń bolmasa keptelistemin dep qońyraý da shalmaidy, al, biz qatar otyryp, kilem toqyǵan qyzdardai shúiirkelesýge jarap qaldyq.
– Ózim týraly aitsam tyńdaisyń ba? – dedi ol.
–...
Terezeden jol shetimen syldyrlap kele jatqan týristerdi tasityn
at-arbanyń kúldiri, sosyn jylqynyń kisinegeni estildi.
– Esimim – Sýana-Kýna. Bul araýkan tilinde úmit jáne jańa atqan kún degen maǵynany bildiredi.
– Ádemi eken.
– Balalyq shaǵym, boijetken kúnderim qos muhittyń salasynda, Patagoniia jazyǵynda ótti. Bul bir qysy jeldi, jazy yzǵarly ashýly meken, sóitse-daǵy, máńgilik jap-jasyl, jer jannaty dersiń... Sen naǵyz chililik, argentinalyq karnavaldardy kórip pe ediń, kórmegen de shyǵarsyń? Túgel jarqyrap, alaý shashqan, kóbelekti eske túsiretin túrli-tústi ǵajap mereke, meniń ómirim de sol kóbelektiń kúndik ǵumyryndai jalt etip óte shyqty-aý. Tyńdap otyrsyń ba, ózi?
Qulaq salmasqa amalym bar ma dei jazdadym da:
– Iá... – dep maquldadym.
– Jer betinde umyt qalǵanyma eki ǵasyr bolsa da, az ómirim Lent, Popaianda merekesin atap ótý sekildi tirshiliktiń tátti jármeńkesinde ótti. Birde aina aldynda shashymdy tarap otyryp, balalyq shaǵymdy artqa tastap, boijetken bula kúnderge aiaq basqanymdy túsindim. Biz sol aida Semanta Santa meiramyna daiyndalýmen áýre edik. Seniń ol merekeden habaryń bar ma?
– Iá, Pasha jeksenbisin atap ótetin...
Men tipti onyń áńgimesin áý dep qostaýǵa jarap qaldym.
– Biz sherý ótetin kóshelerdi gúlmen árlep, óz qolymyzben jasaǵan qolóner buiymdaryn saýdalaý úshin júgeri unyn salatyn, tuz salatyn shaǵyn bóshkelerdi, aǵash tostaǵandar men qasyqtardy boiap, kúlli Patagoniia jazyǵy gúlge malynatyn. Tátti sharaptar, kofe men kakaonyń jupary kernep, teńiz qudaiy Emananyń qurmetine boijetkenderge átir taratqanda bizdiń kóshelerimizge hosh iisi sińip qalatyn. Biz Semanta Santaǵa daiar edik. Seni jalyqtyryp almadym ba? Sen alǵash kórgen adamyńa qalai baǵa beresiń?
– Adamnyń kelbetine qarap tujyrý asyǵystyq-aý. Sózine qarap baǵalarmyn...
– Sózi, baiany adamnyń ainasy emes pe?
Men de solai oilaimyn. Biraq, meniń sulýlyǵymdy sen kórmediń, jarqyraǵan qara kózderimdi, shiedei erinderimdi, siraǵym qysqa bolǵanymen, dóńgelengen bóksemdi kórmediń, júregimniń sheksiz baqyttan shattanǵan dúrsilin, And taýlaryn jańǵyrtyp án salatyn daýsymdy sen estimediń. Jalpy, anaý zalda jatqan «Uiqydaǵy arýǵa» qarap, sózimniń bári jalǵan deýge bolady.
Ekeýmiz de bir sát únsiz qaldyq.
– Úlken úsh ápkem turmys qurǵan soń, kezegim jetkenin sezdim. Bir tańda anam uzatylatynymdy aitty. Bizdiń otbasy kúieýimdi Tados Los Santos festivalinde baiqap unatypty. Qyzyqty qarashy, ony bári biledi eken de, tek meniń esimde saqtalmapty. Ákem ony symbatty qaratory jigit dep sipattady. Anam eńbekqor dep maqtady. Inim bolsa, jo-joq, seniń kúieý jigitiń etjeńdi, tapal boily azamat, dástúrli sombrero qalpaǵyn kigende ol kádimgi sańyraýqulaqqa uqsap qalady, – dep qýaqylandy. Al, men bolsam... Ol týraly kim ne aitsa da qýanyshtan syqylyqtap kúle berdim. Men óz hanzadamdy eń kúshti Inti qudai, ózimdi onyń jary Mama Quilla dep bildim. Aitshy, armanmen ómir súrgen jaqsy, á?
– Árine, biz armandarymyzǵa raqmet aitýǵa tiispiz.
– Aitasyń-aý, sol armandarymnyń biri de oryndalmady. Sol Samanta-Santa merekesi ómirimdegi sońǵy karnaval eken. Sol jyly bizdiń ólkede jaýyn- shashyn az boldy. Ondai jyldary Tlos qudaidyń raqymyn alý úshin qurban shalynatyn. Jastardyń kóz jasy jerdi sýlandyrady dep senetin. Meni mereke ústinde dindarlar urlap áketti...
Munan soń ekeýmiz de tis jarmadyq. Endigisin álgi qorqynysh jónimen ketip, onyń ornyna eńseni ezgen aýyr únsizdik keńirdegimdi býyp azapqa tústim. Jan-tánińmen qutqarǵyń keletin, biraq, qolyńnan túk kelmeitinin óziń uqqan dármensiz, sharasyz hál. Eshqashan sezinbegen bir qaiǵy.
– Meni eshkim túsinbedi, men de olardy uqpadym. Arqanmen matap, Ampato taýyna qarai alyp jónelgeni, masaitatyn sýsyn bergeni esimde. Arǵy jaǵyn bilmeimin, múmkin taýdyń sýyǵyna shydamai qatyp qalǵan shyǵarmyn? Al, Hárison hanym taýyp alǵan soń esimdi jisam, arada eki júz jyl ótip ketipti.
– Keide kúieý jigitimdi oilaimyn, – dedi ol. – Men úshin kóp qaiǵyrdy-aý, á? Kóz jasy sýalǵan kúni Patagoniia jazyǵyndaǵy taǵy bir sulýǵa ǵashyq bop, sosyn úilenip, sosyn myna qyzyq ǵalamnan qartaiyp ótken bolar?
Munan soń óksip-óksip jylap jibergenim esimde, ol jubatpaq bolsa da, tynyshtalýdan bas tartqanym esimde...
Bir aptadan soń óz jobasyna qatysty baiandama ázirlep, bir qushaq saraptamanyń ortasynda otyrǵan bólim basshysyna kirip, tóbeden tik túskendei aityp saldym:
– «Uiqydaǵy sulýdyń» esimi – Sýana-Kýna. Ony karnaval kezinde urlap, jańbyr qudaiyna qurban shalǵan.
– Siz bul týraly qaidan bilesiz?
– Sýana-Kýnanyń ózi aitty.
Bul jaýaptan keiin professor Hárison maǵan qadala qarady. Júikesi tozǵan áldekimge degen aianyshty, músirkeýli kózqaras.
***
...Arada bir jyl ótken. Bul kezde mýzeide emes, qalalyq ýniversitettiń joǵalǵan tilderdi zertteitin bóliminde jumys istep júrdim. Túngi saǵat tórtte uialy telefonym bezek qaqty. Áli jantaimaǵan, ilde kóz shyrymyn endi almaqqa qaǵazdarymdy jinai bastaǵan ýaqyt. Túngi nómirdiń iesi professor Málisa Hárison ekenin kórgende tańyrqadym. Lingvist tátei kóńilsizdikten telefon shalatyndai jaqyn adamdar emespiz, ómirdiń bir aialdamasynda kezigip qap esendesip, sosyn nómiri basqa kólikterge otyryp ketken júzi tanystarmyz.
– Tyńdap turmyn, Hárison hanym.
– Sizdiń esiktiń aldynda turmyn, kezdessek bola ma?
Úrker aýǵanda úige qonaq shaqyryp, kofe usynbasym belgili, tápishkemdi súiretip tómen tústim. Ár tańda bótelke jinaityn daǵdysymen Flashing aýmaǵynyń qoqysyn aqtarýǵa shyqqan qojaiynnyń kári ákesin dálizde ushyrattym. Aqkóńil qariia sóileitin Hakka-gań dialektisin mandarin tilin zertteýshiniń ózi uqpaǵanda men jetistiremin be, ekeýmiz tek kóńil tilinde, júzimizdiń darqandyǵy men daýysymyzdyń beibit nyshany arqyly túsinisetinbiz.
– Ata, amansyz ba? Syrtta bireý shaqyryp, soǵan shyqtym, – dedim. Ol sóilep-sóilep eski qolshatyr usyndy. Úide otyryp sezbeppin, kóshede jańbyr sebezgilep turǵan. Meni baiqai sala, professor kóliginen tústi. Túngi kóileginiń syrtynan qystyq páltesin jelbegei ilipti, qoly aýa qarmap, emotsiiasyn basqara almai tutyqty.
– Málisa, sizde bári durys pa?
– Búgin bilesiz be, Men Patagoniia arýyna qatysty kúlli derekterdi taptym. Ol shynymen siz aitqandai... Aityńyzshy, ol aqparattardy qaidan aldyńyz?
– Sýana-Kýnanyń ózi aitty.
– Keshirińiz meni, keshińiz, – dep uiqy kóilegindegi hanym bezek qaqty. – Siz bul derekterdi qai arhivten qaradyńyz? Álde meniń áriptesterim aitty ma? Ótinemin, tek jasyryp qalmańyzshy?!
– Sýana-Kýnanyń ózi aitty.
– Ózi aitty? Osy bir aýyz jaýabyńyzben meni jyndy qylyp kelesiz!
– Sebebi, basqa sózim joq! Hárison hanym, qaidaǵy arhiv, men arheologtardyń jumaǵy Latyn Amerika elderine túsimde de baryp kórmedim! Araýkan tilinde amandasa da almaitynymdy, ispanshanyń ózin ana tilim qazaqshanyń dybysymen zorǵa sóileitinimdi kórmeisiz be? Ol qujatty qolǵa túsirgende de ne bitirýshi edim?
– Qudai úshin maǵan jaqsy qarańyzshy! Endi professor jylai bastady.
– Osy oqiǵany baian qylǵanymda áldebir elirip aýyratyn syrqatqa qaraǵandai júzben zer salǵansyz.
– Keshirińiz, osy jaýa-byńyzǵa ózińiz senesiz be?
– Senemin! Ótken ýaqyttan oralǵan adamdarǵa, tarihtyń qaitalaný qubylystaryna qatysty ǵylym nelikten jumǵan aýyzyn ashpaidy? Fizikter nege jerge qaraidy? Chalkannyń sońǵy shamany qara tabanymen shoq keship, zákir salǵanda kókte nelikten bult jóńkilip, naizaǵai oinaidy? Qart eskimos juldyzdardyń ornalasýyna qarap erteńgi jer silkinisin qalai dál boljaidy? Búkil etikany jinap qoiyp, osy jańalyqty menen buryn bireý aityp qoia ma degen úreimen tań atpai maǵan qarai júgirgenshe, myna biz ómir súretin álemde jaýaby jabyq jumbaqtardyń da baryna zer salyńyz. Olar eshqashan ǵylymnyń tabiǵi radiatsiialardyń kóleńkesi degendei sandyraqtaryna baǵynǵan emes.
– Siz ashýlysyz ba?
– Iá, men ashýlymyn.
Sol sátte aspan kúrkirep nóser tópep ketti.
– Meni keshirińiz.
– Myna mazalaýyńyzdy da keshiremin. Al, kúdigińiz naǵyz qorlyq boldy.
– Ǵafý ótinemin. Ekeýmiz de emotsiiamyzdy basqara almai turmyz.
– Sýana-Kýna músinshiniń qolynan shyqqan joq, ol adam. Táni semgenmen jany keńistikte qaldy, osy álemmen birge jasaýda. Jannyń da óz aitary, tirshiliktiń kóshinde bir mezet kórinip qalýǵa quqy bar ma? Bar! Budan basqa jetkizetin túgim joq. Malmandai sý boldym, saý bolyńyz.
Málisanyń ne degenin estimedim. Tamaq surap aiaǵyma oralǵan mysyqqa dirildegen qoldarymdy ázer basqaryp as quiyp turyp jeti túnde kóńilsizdiktiń kúlin shashyp ketken lingvist áieldi tezirek umytsam dep kúrsingenim, tósegime qisaiǵanym esimde. Sosyn Niý-Iorktyń alyp joldarynyń shýyly da, terezeni tepkilegen aq jaýynnyń tysyry da jumsaryp, juqaryp, joǵalyp ketti.
Sol tańda túsimde Sýana-Kýnany kórdim. Ol And taýlarynyń baýraiyndaǵy shalǵynda sebetine qyzǵylt tústi chýviragýalardy toltyryp, bilep júr eken.
«Aq jelken» jýrnaly, №10
Qazan, 2020
