QR Prezidenttigine kandidattyń memlekettik tildi erkin meńgergenin anyqtaityn lingvistikalyq komissiia tóraǵasy Myrzatai Joldasbekov «Nur Otan» partiiasynyń atynan kandidat Qasym-Jomart Toqaevtyń emtihan nátijesin jariia etti, dep habarlaidy "Ult aqparat".
«Ózderińiz bilesizder, «Nur Otan» partiiasy usynǵan úmitker Qasym-Jomart Kemeluly Toqaev búgin kelip emtihan tapsyrdy. Eki saǵattyń deńgeiinde bizdiń ortamyzda boldy. Erejege sáikes emtihan tapsyrdy. Birinshi jazba jumysynyń taqyryby - «Abai Qunanbaiulynyń poeziiasy men qara sózderi». Ekinshi mátin oqýǵa Sherhan Murtazanyń «Myńbulaq» áńgimeler men hikaiattar jinaǵyn tańdap aldy. Úshinshisi ol kisiniń janyna jaqyn «Qazirgi Qazaqstannyń geosaiasaty» taqyryby boldy», - dedi Myrzatai Joldasbekov.
Onyń aitýynsha, prezidenttikke úmitkerden emtihan alýǵa komissiianyń músheleri tolyq qatysyp, ózderiniń pikirlerin ashyq aitqan.
«Bir de bir qate kórgenimiz joq. Ótken jolǵy prezidentimiz de osylai jazǵan edi. Birinshi shyǵarma jazǵanda Abaidyń poeziiasy, qara sózderi, onyń jalpy halyqqa beretin mańyzy týraly búgingi úmitkerimiz tereń tolǵaǵan. Óte ádemi jumys. Sherhan Murtazanyń «Myńbulaq» áńgimeler men hikaiattar jinaǵynyń úsh betin oqydy. Mánerlep, yrǵaǵymen óte ádemi oqyp berdi. Al «Qazirgi Qazaqstannyń geosaiasaty» jaiynda keń tolǵady, tereń sóiledi. Jalpy bizdiń lingvistikalyq komissiianyń bergen qorytyndysy Qasym-Jomart Kemeluly Toqaev memlekettik tildi tolyq, jan-jaqty meńgergen», - dedi komissiia tóraǵasy.
