Elordada lift ishinde áielin soqqyǵa jyqqan er adamnyń áreketi jurttyń jaǵasyn ustatty. Jábirlenýshiniń aitýynsha, jýan judyryqty kúieýi ony tipti óz týystarynan da qyzǵanǵan. Aýyr soqqy men tepkiden áieldiń tórt jerden súiegi synyp, miy shaiqalǵan. Shekten tys qyzǵanysh sebep bolǵan, - dep habarlaidy Tengrinews.kz tilshisi KTK telearnasyna silteme jasap.
Telearna siýjetinde erli-zaiypty otasqanyna 4 jyl bolǵany aitylady. Kórgen qorlyǵym tek bul emes deidi ol. Enesi osyndai otbasyndaǵy zorlyq-zombylyqpen kúresip, áiel men bala quqyǵyn qorǵap júrgen belsendi eken. Arýjan joldasymen 2018 jyly otaý qurǵan. Eki balasy bar.
"Biraq, otbasy degen aty ǵana. Birge bolǵan jyldarymnyń barlyǵynda uryp-soǵýdan kóz ashpadym" deidi Arýjan.
Kelinshektiń aitýynsha, kórmegeni joq. Urǵan, soqqan, býyndyrǵan. 20 gradýs sýyqta balkonǵa qamap qoiǵan. Kóp jaǵdaiǵa janjalǵa shekten tys qyzǵanysh sebep bolady eken. Tipti keiingi kezde óz týysqandarynan da qyzǵanýdy shyǵardy deidi Arýjan. Jelide taraǵan videoǵa da sondai jaǵdai sebep bolypty.
"Biz ekeýmiz meniń týystarymnyń shaqyrýymen karaokege bardyq. Bir sátte men qolyma mikrofan alyp án shyrqai bastadym. Ekinshi mikrofondy kúieý balam, iaǵni sińlimniń joldasy alyp qosyldy. Kúieýim dereý uialy telefonyma qorqytyp habarlama jiberdi. Kesh tarqap úige kelgende jedel saty esigi jabylmai jatyp meni ura bastady. Men jerge qulap qaldym", - deidi jábirlenýshi Arýjan Baimetova.
Biraq joldasynyń sol kúngi tómpeshi munymen bitpepti. Onyń aitýynsha, kúieýi ózderin úige jetkizip tastaǵan inisimen birge boldyń dep, áielin taǵy soqqynyń astyna alǵan. Biraq politsiia bul derekti eskermei otyr deidi Arýjan.
Jalpy, sol kúngi soqqydan kelinshektiń tórt birdei súiegi synyp, miy shaiqalǵan. Al enesi bolsa, bul bárimizdiń basymyzdan ótken jaǵdai dep jubatady eken.
"Onyń ata-anasy janjal ústinen túskende ony sabyrǵa shaqyrýǵa tyrysatyn. Anasy menimen óte kóp sóilesetin. Barlyǵy jaqsy bolady dep sendirdi. "Barlyq er osylai urady, meni de urdy, meniń ájemdi de urdy" deitin. Men osy sózderdiń maǵan áser ete bastaǵanyn da baiqamai qalyppyn", - deidi Arýjan Baimetova.
Sol sabyrǵa shaqyrǵan enesi, telearna málimetinshe, Shymkent qalasyndaǵy belsendilerdiń biri eken. Dálirek aitqanda, balalar men áielder quqyǵyn qorǵaý jónindegi keńestiń tóraiymy. Uly jelini shýlatqannan keiin Gúlaiym Shuńǵaraeva áleýmettik jelidegi paraqshalaryn túgel óshirip tastaǵan. Ózimen telefon arqyly tildeskende "balamdy qoldamaimyn" dep otyr eken. Birge turǵanda eshqandai oǵash qylyǵyn baiqamadym dep aqtaldy.
"Bul jaǵdaidy aityp óterim, árine, qoldamaimyn. Biraq bul Astanada bolǵan oqiǵa. Tórt jarym jyl boiy balam men kelinim meniń qolymda turdy. Eshqandai mundai nárse, áýestik, qol jumsaý degen bolǵan emes", - dep pikir bildirgen kúdiktiniń anasy Gúlaiym Shuńǵaraeva.
Al lift ishinde áielin soqqyǵa jyqqan er adamǵa qatysty Qylmystyq kodekstiń 107, iaǵni densaýlyqqa qasaqana aýyrlyǵy ortasha ziian keltirý babymen qylmystyq is qozǵalǵan. Er adam qolhatpen bosatylǵan eken. "Qalǵan aqparat tergeý múddesine bailanysty jariia etilmeidi" dep, qysqa qaiyrdy tártip saqshylary. Al joldasynan zábir kórgen Arýjan Baimetova jaqyn kúnderi zańdy túrde ajyraspaq niette.
