31 naýryzda QR Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń otyrysy ótti, dep habarlaidy QazAqparat.
Otyrysta Qazaqstan Respýblikasyndaǵy otbasylyq jáne genderlik saiasat tujyrymdamasyn 2021 jyly iske asyrý jáne nysanaly indikatorlarǵa qol jetkizý nátijeleri tyńdaldy. Sonymen qatar kún tártibine ómirlik qiyn jaǵdaiǵa tap bolǵan otbasylarǵa kómek kórsetý boiynsha vedomstvoaralyq ózara is-qimyl; áielder kásipkerligin qoldaý ortalyqtarynyń qyzmeti; QR SIM-niń Qazaqstannyń genderlik kún tártibin halyqaralyq alańdarda ilgeriletý jáne genderlik teńdikti qamtamasyz etý salasynda eldiń halyqaralyq mindettemeleriniń oryndalýyna baqylaý jasaý máseleleri engizildi.
Otyrysty asharda Ulttyq komissiianyń tóraiymy, Parlament Májilisiniń depýtaty Lazzat Ramazanova Memleket basshysynyń tapsyrmalaryn oryndaý aiasynda ortalyq jáne jergilikti atqarýshy organdarmen birlesken jumys aýqymyn atap ótti. Ulttyq komissiia basshysy, bul jumysta ótkir áleýmettik problemalardy jedel sheshýge basty nazar aýdarylatynyn atap ótti. Ulttyq komissiia áleýmettik belsendi aýditoriia men sarapshylar úshin dialog alańyn usynady, onda eń kóp qoǵamdyq rezonans alǵan jáne neǵurlym egjei-tegjeili talqylaýdy talap etetin taqyryptar talqylanady.
Sonymen birge áielderge qatysty zorlyq-zombylyq úshin jazany qatańdatý qajettigi máseleleri boiynsha Bas prokýratýramen, Úkimetpen jáne jergilikti atqarýshy organdarmen ózara is-qimyl kúsheitiletin bolady.
Atalǵan máselelerdi tyńdaý barysynda jergilikti atqarýshy organdardyń memlekettik áleýmettik tapsyrys sheńberinde «Otbasylyq-demografiialyq jáne genderlik máselelerdi sheshýge járdemdesý» baǵyty boiynsha jumysy usynyldy. Sonyń ishinde 322,5 mln.teńge somasyna 135 áleýmettik jobanyń iske asyrylǵany kórsetildi. Bul baǵyttaǵy jumystar 5 óńirde - Túrkistan, Qostanai, Atyraý, Batys Qazaqstan, Jambyl oblystarynda belsendi júrgizilgeni atap ótildi.
Qorǵanys Ministrliginiń basqa memlekettik organdarmen birlesip qurǵan «Jas sarbaz» balalar-jasóspirimder áskeri-patriottyq qozǵalysynyń oń róli atap ótildi. Atalǵan birlestik sheńberinde jastardy áskeri-patriottyq tárbiemen, onyń ishinde áskeri-sporttyq is-sharalar ótkizý jolymen qamtý 230 myńnan astam balany quraidy.
Jalpy, tárbie jumysy boiynsha qabyldanyp jatqan sharalardyń nátijesinde 2021 jyly kámeletke tolmaǵandarǵa qatysty qylmystar sanyn 20%-ǵa tómendetýge qol jetkizildi, bul Tujyrymdamanyń mańyzdy nysanaly indikatorlarynyń biri bolyp tabylady.
Halyqaralyq yntymaqtastyqty keńeitý sheńberinde Syrtqy ister ministrliginiń genderlik kún tártibinde búgingi Qazaqstan úshin ózekti áielderdiń ekonomikalyq quqyqtary men múmkindikterin keńeitý, áielderge qatysty zorlyq-zombylyqty joiý, ulttyq josparlaý jáne biýdjetteý máseleleri boiynsha kúsh-jigerdi qoldaityny atap ótildi.
Otyrys sońynda Lazzat Ramazanova kún tártibin qorytyndylai kele, otbasyndaǵy qolaisyzdyqtyń negizgi sebepteri bolyp jumyssyzdyq, turǵyn úidiń bolmaýy, otbasyndaǵy zorlyq-zombylyq, sozylmaly jáne narkologiialyq aýrýlar, basqa da materialdyq problemalar siiaqty áleýmettik faktorlar áli de oryn alyp otyrǵanyn aitty. Osyǵan bailanysty Ulttyq komissiia tóraiymy jergilikti atqarýshy organdardyń qiyn jaǵdaidaǵy otbasylardy anyqtaý jáne esepke alý, aldyn alý sharalaryn júrgizýde tyǵyz ózara bailanysta bolýy jáne basqa máseleler boiynsha memlekettik organdarǵa birqatar naqty tapsyrmalar berdi.
