Niý-Iorkte «Genderlik teńdikti jedeldetý jáne barlyq áielder men qyzdarǵa múmkindik berý» atty áielder jónindegi búkilálemdik konferentsiia ótti, dep habarlaidy "Ult aqparat".
Konferentsiia BUU Bas Assambleiasynyń 75-sessiiasynda áielderdiń quqyqtaryn qorǵaý týraly Beijiń deklaratsiiasynyń 25 jyldyǵyna arnalǵan.
Jiynda Qazaqstan Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń tóraǵasy Lazzat Ramazanova sóz sóiledi.
Ol Beijiń deklaratsiiasy Qazaqstandaǵy genderlik progresstiń katalizatoryna ainalǵanyn atap ótti.
«Genderlik saiasattyń ulttyq modeli, áielderdiń quqyqtaryn qorǵaýdyń quqyqtyq bazasy men tetikteri quryldy. 2030 jylǵa deiingi otbasylyq-genderlik saiasat tujyrymdamasynyń ekinshi kezeńi júzege asyrylýda. Ol Beijiń deklaratsiiasy men Áielderge qatysty kemsitýshiliktiń barlyq túrlerin joiý týraly konventsiiany júzege asyrýǵa baǵyttalǵan. Áielder men balalardyń quqyqtaryn qorǵaý boiynsha keshendi sharalar qabyldanýda. Jyl basynda áielder men balalardyń jynystyq qol suǵylmaýshylyǵyna, adam saýdasyna jáne turmystyq zorlyq-zombylyqqa qarsy qylmystar úshin qylmystyq jaýapkershilik kúsheitildi. Parlamentte depýtattardyń Ulttyq komissiiamen birlesip bastaý alǵan otbasylyq zorlyq-zombylyqtyń aldyn-alý jáne genderlik saiasat týraly zań jobalary qaralýda. Áielderdiń saiasattaǵy ókildiginde, olardyń ekonomikalyq múmkindikterin keńeitýde progreske qol jetkizilýde», - dedi Lazzat Ramazanova.
Búgingi tańda Qazaqstannyń memlekettik qyzmetindegi basshylyq qyzmetterdegi áielderdiń úlesi 40% quraidy. Parlament Májilisindegi ókildik - 27%, jergilikti ókildi organdarda - 22%. Áiel sýdialardyń sany 51% jetti. Sonymen birge áielderdiń 43%-y shaǵyn jáne orta bizneste jumys isteidi, al 78%-y jeke kásipkerler. Ekinshi deńgeili bankterdiń basqarý quramynda 25% áielder.
Ulttyq komissiia tóraǵasy Qazaqstan áielderi pandemiia jaǵdaiynda janqiiarlyqpen jumys istep jatqanyn atap ótti. Bul, eń aldymen, densaýlyq saqtaý jáne áleýmettik qorǵaý salasyndaǵy qyzmetkerler, olardyń osy salalardaǵy úlesi 71% quraidy. Qazaqstan aqshalai jáne azyq-túlik kómekten, áleýmettik tólemderdi indeksteý jáne biznesti qoldaý boiynsha shuǵyl sharalar qabyldaýdan turatyn daǵdarysqa qarsy sharalar paketin qabyldady.
Qazaqstan BUU bastamasymen BUU-75 formatynda Álemniń bolashaǵy týraly jahandyq diskýssiiany qoldaidy. Búginde adamzatqa tez arada qaýip tóndiretin qaterge qarsy elderdiń kúsh-jigeri men integratsiiasyn biriktirý qajet.
«Biz BUU platformasynda jahandyq daǵdarystan kezeń-kezeńimen shyǵý boiynsha usynystar ázirleitin daǵdarysqa qarsy ortalyq, sondai-aq, áielderdiń quqyqtaryn qorǵaý, olardyń saqtalýyn baqylaý jónindegi sharalardy júzege asyrýdaǵy memleketterdiń ozyq tájiribelermen jedel almasý úshin biryńǵai Bank qurýdy usynamyz. Birlesken tájiribe zamanaýi syn-qaterlerden immýnitetke ainalatyny sózsiz jáne bul alǵa jyljýdyń negizi», - dep atap ótti ol.
