Elimizdegi birqatar úkimettik emes uiym ókilderi latyn qarpine kóshýdi qoldaitynyn aityp, málimdeme jasady. Halyqaralyq «Janashyr» qorynyń prezidenti Jańyl Ápetova latyn jazýyna kóshý bizdi álemniń ár túkpirindegi 5 millionǵa jýyq qazaqtarmen jaqyndastyra túsedi degen pikir bildirdi.
Qor basshysynyń aitýynsha, búgingi tańda kirill jazýyn álemniń 12 memleketi ǵana paidalanady. Al qalǵandarynyń kópshiligi latyn álipbiin qoldanady. Demek, bul keń taralǵan jazý. «Qazir álemniń túkpir-túkpirinde 5 millionǵa jýyq qazaq turady. Olardyń 80 paiyzy latyn álipbiin paidalanady. Iaǵni, biz bolashaqta latyn álipbiine kóshsek, sol qandastarymyzben jaqyndasa túsemiz. Bul – syrttaǵy aǵaiynnyń kópten kútken armany. Biz, qazaqstandyqtar kópshilik bolyp latyn qarpine kóshýge daiyn ekenimizdi kórsetip, osyndai mańyzdy qadamǵa barýǵa aýyzbirshilik tanytqanymyz jón bolady»,- deidi ol.
Sonymen qatar, «Janashyr» qorynyń prezidenti latyn álipbiine kóshýge qatysty halyqqa júrgizilgen saýalnama qorytyndylaryn da jariia etti. Din isteri jáne azamattyq qoǵam ministrliginiń qoldaýymen «Azamattyq bastamalardy qoldaý ortalyǵy» kommertsiialyq emes mekemesiniń granttyq baǵdarlamasy aiasynda «Halyqtyń ulttyq mádeni-birligin saqtaýdaǵy ziialylardyń róli» dep atalatyn joba boiynsha konferentsiialar men dóńgelek ústelder, mektep jáne kolledj oqýshylarymen kezdesýler ótkizilgen. Osy basqosýlarda latyn qarpine kóshý týraly saýalnama júrgizilgen. Saiyp kelgende, suraý salynǵandardyń 80-90 paiyzy latyn jazýyna kóshýdi biraýyzdan qoldaityndaryn aitypty.
Elbasynyń bastamasyn aýǵan soǵysy ardagerleri uiymdarynyń «Qazaqstan ardagerleri» qaýymdastyǵy da tolyǵymen qoldaitynyn málimdedi. Qaýymdastyq tóraǵasy Baqytbek Smaǵuldyń aitýynsha, latyn qarpi arqyly elimiz qazirgi zamanǵy tehnologiialyq ortaǵa, kommýnikatsiiaǵa, sondai-aq, ǵylymi jáne bilim berý úderisine tereńirek kirige túsedi.
«Memleket bul iske barynsha baiyptylyqpen, dáiektilikpen jáne daiyndyqpen kirisýde. Qazaqtyń jańa jazýynyń synshysy da, tilekshisi de, tóreshisi de halyq bolmaq. Demek, álipbidiń sońǵy nusqasynyń qandai bolatyny da barsha qazaqstandyqtarǵa bolýǵa tiis. Bul bastama bólinip-jarylýǵa emes, eskiden arylýǵa, sananyń jańǵyrýyna, memlekettik tildiń jańasha damýyna bastaidy. Táýelsiz Qazaq eliniń azamattaryna áldeneni syrttan tańýǵa eshkimniń haqysy joq. Bul – bizdiń, táýelsiz Qazaqstannyń órkeniettik tańdaýy. Bul tańdaýda da barsha qazaqstandyqtardyń kezekti ret yrys pen izgilikke ushtasar biraýyzdylyq tanytaryna senim bildiremiz»,- deidi Baqytbek Smaǵul.
