Qazaqstanda aqparattyq taqtaishalar, mańdaishalar men jarnamalardy latyn grafikasynda ornalastyrýǵa ýaqytsha shekteý engizilýi múmkin. Ǵylym jáne joǵary bilim ministrligi jetildirilgen álipbi men onyń emlesi resmi bekitilgenge deiin ákimdikter men memlekettik organdarǵa jańa jazýdy qoldanýdy toqtata turýdy usyndy, dep habarlaidy ult.kz.
31-arnanyń “Informbiýro” jańalyqtar baǵdarlamasynyń habarlaýynsha, bul talap menshik nysanyna qaramastan barlyq uiymǵa qatysty bolmaq. Iaǵni memlekettik mekemelermen qatar, jekemenshik kásiporyndar, dúkender, dámhanalar men basqa da nysandardyń latyn grafikasyndaǵy kórneki aqparattaryna da qatysty.
Qazir Qazaqstanda qazaq tiliniń latyn grafikasyna negizdelgen ortaq standarty tolyq bekitilgen joq. Soǵan qaramastan, kóptegen kásipkerlik nysandar óz ataýy men jarnamasyn latynsha jazýǵa kóship úlgergen. Nátijesinde bir sózdiń ártúrli jazylýy qalyptasyp, ár mekeme óz nusqasyn qoldanǵan.
Mysaly, keibir jazýlarda qazaq tilindegi dybystar aǵylshyn tiliniń úlgisimen berilse, endi birinde arnaiy tańbalar qoldanylǵan. Osyǵan bailanysty ortaq emle bekitilmei turyp latyn grafikasyn jappai engizý tildik birizdilikke keri áser etýi múmkin.
Ministrlik ortalyq memlekettik jáne jergilikti atqarýshy organdarǵa jetildirilgen álipbi bekitilgenge deiin barlyq uiymdardyń latyn grafikasyndaǵy kórneki jáne ózge de aqparatyn ornalastyrýdy toqtata turýdy usyndy.
Qazaqstanda latyn qarpine kóshý ideiasy 2017 jyly kóterilgen bolatyn. Sodan beri birqatar mekeme men biznes nysany mańdaishalaryn ózgertip, latyn grafikasyn qoldana bastady. Alaida álipbi men emle máselesi tolyq sheshilmegendikten, bul baǵytta ortaq standart qalyptasqan joq.
Qazir qazaq tiliniń latyn grafikasyna negizdelgen jetildirilgen álipbii men emlesin ázirleý jumystary jalǵasyp jatyr. Mamandardyń aitýynsha, túpkilikti nusqa bekitilgennen keiin el aýmaǵyndaǵy jazýlardy birizdendirý máselesi de qaita qaralýy múmkin.
