Qazaqstanda kontsert kezinde fonogrammamen án aitýǵa qatysty jańa talap kúshine endi. Endi kontserttik-oiyn-saýyq jáne mádeni-buqaralyq is-sharalarda vokaldy fonogrammany paidalanǵan oryndaýshylar men uiymdastyrýshylar ákimshilik jaýapkershilikke tartylýy múmkin, dep habarlaidy ult.kz.
Ózgeristerge Prezident Qasym-Jomart Toqaev 19 maýsymda qol qoiǵan «Qazaqstan Respýblikasynyń Qylmystyq kodeksine jáne Qazaqstan Respýblikasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» №318-VIII QRZ zańynda kózdelgen.
Zańǵa sáikes, Ákimshilik quqyq buzýshylyq týraly kodekstiń 156-baby jańa úshinshi jáne tórtinshi bóliktermen tolyqtyryldy.
Endi kontserttik-oiyn-saýyq jáne mádeni-buqaralyq is-sharalar kezinde uiymdastyrýshylardyń, shyǵarmashylyq ujymdar men oryndaýshylardyń daýys (vokaldy) fonogrammasyn paidalanýy aiyppul salýǵa ákep soǵady.
Birinshi ret anyqtalǵan jaǵdaida jeke tulǵalarǵa 100 AEK, al zańdy tulǵalarǵa 150 AEK kóleminde aiyppul salynady.
Eger jaza qoldanylǵannan keiin bir jyl ishinde zań buzýshylyq qaitalansa, aiyppul kólemi artady. Bul jaǵdaida jeke tulǵalar 150 AEK, al zańdy tulǵalar 200 AEK tóleidi.
Alaida jańa talaptyń da erekshelikteri bar. Tyiym televiziialyq jazbalar men túsirilimderge, sondai-aq kontserttik is-sharalardy ótkizýge arnaiy beiimdelmegen jáne arnalmaǵan ózge de oryndarǵa qoldanylmaidy.
Osylaisha, sahnada jandy daýyspen óner kórsetýge qoiylatyn talap kúsheiip, fonogrammaǵa súienetin oryndaýshylar men kontsert uiymdastyrýshylaryna naqty ákimshilik jaýapkershilik engizildi.
