Qazaqstanda azamattardyń qarjylyq ónimderdi paidalanýyna qatysty jańa talaptar engiziledi. Ózgerister bankterge, mikroqarjy uiymdaryna, saqtandyrý kompaniialaryna, brokerlerge jáne basqa da qarjy uiymdaryna qatysty, dep habarlaidy ult.kz.
Qarjy naryǵyn retteý jáne damytý agenttiginiń jańa qaýlysy 19 qazanda kúshine enedi.
Eń mańyzdy ózgeristerdiń biri – azamattarǵa qamtamasyz etilmegen qaryzdan jáne onymen birge rásimdelgen erikti saqtandyrýdan shart jasalǵan kúnnen bastap 14 kúntizbelik kún ishinde bas tartý quqyǵy beriledi.
Bul úshin qarjy uiymy klientten aiyppul nemese ósimpul talap ete almaidy. Alaida qaryzdy naqty paidalanǵan kúnder úshin eseptelgen syiaqy, saqtandyrý polisi qoldanylǵan kezeńge tiesili saqtandyrý syilyqaqysynyń bir bóligi nemese qarjylyq ónimdi usynýǵa bailanysty naqty shyǵyndar alynýy múmkin.
Jańa talap boiynsha bank pen MQU klientke kelisimshartqa qol qoimas buryn qarjylyq ónimnen nemese qosymsha qyzmetten aiyppulsyz bas tartýǵa bolatynyn habarlaýǵa mindetti. Bas tartý tártibi qarapaiym ári túsinikti bolýy kerek.
Sonymen qatar qarjy uiymdaryna klientterge qosymsha qyzmetterdi májbúrlep usynýǵa, ónimniń mańyzdy sharttary men quny jáne táýekelderi týraly aqparatty jasyrýǵa tyiym salynady. Sondai-aq ótinimder men kelisimsharttarda aldyn ala belgilengen uiashyqtar arqyly klienttiń kelisimin alýǵa jol berilmeidi.
Qarjy uiymdary budan bylai ónimniń naqty klientke qanshalyqty sáikes keletinin de baǵalaýy tiis. Eger nesie nemese basqa qarjylyq ónim azamattyń maqsatyna, qarjylyq jaǵdaiyna jáne múmkindigine sáikes kelmese, ony usynýǵa nemese berýge bolmaidy.
Jarnamaǵa qatysty talaptar da kúsheitiledi. Qarjylyq ónimniń quny, tabystylyǵy, táýekelderi men sharttary týraly tutynýshyny jańylystyratyn aqparat berýge tyiym salynady. Al jarnamada tólemder týraly málimet kórsetilse, onda mólsherlemeler, komissiialar, tarifter jáne basqa da shyǵyndar týraly tolyq aqparat berilýi kerek.
Jańa talaptar kúshine engennen keiin qarjy uiymdary alty ai ishinde qoldanystaǵy qarjylyq ónimderge jospardan tys tekserý júrgizýge mindetti. Eger ónim jańa talaptarǵa sáikes kelmese, onyń sharttary ózgertilip, bul týraly retteýshi organǵa habarlanady.
Osylaisha, qazaqstandyqtar qajetsiz nemese óz jaǵdaiyna sáikes kelmeitin qarjylyq ónimderden qorǵalatyn bolady. Ásirese bul kepilsiz tutynýshylyq nesieler men olarǵa qosylatyn qosymsha qyzmetterge qatysty.
