Ońtústik Qazaqstan oblysynda əkimdiktiń uiymdastyrýymen «Rýhani jańǵyrý: memlekettik tildiń latyn qarpine kóshýi» taqyrybynda jergilikti buqaralyq aqparat quraldarynyń basshylarymen kezdesý bolyp ótti. Jiynǵa saiasattanýshylar Erlan Sairov pen Talǵat Qaliev, qoǵam qairatkeri Əmirjan Qosanov pen jýrnalist-sarapshy Rýslan Jeldibai qatysty, dep habarlaidy QazAqparat tilshisi.
Latyn álipbiin nasihattaý maqsatynda kelgen arnaiy top músheleri ońtústiktegi jeli belsendileriniń usynystaryn estip, saýaldaryna jaýap berdi. Toptyń jetekshisi saiasattanýshy Erlan Sairov Qytai men Japoniia elderin mysalǵa keltire otyryp, damyǵan memleketterdiń halyqaralyq deńgeige shyqqan kezde mindetti túrde latyn grafikasyn paidalanatynyn atap ótti. Sonymen qatar latyn álipbiine enýdiń rýhani missiiasyn, qoǵamda qundylyǵymyzdy túsirmeýimiz kerek dep aityp ótti. Bul rette eldegi azamattardyń oi pikiri eskerilip, arnaiy komissiiaǵa usynylatynyna toqtaldy.
«Kezinde Atatúrik Eýropaǵa kirý úshin, óziniń baýyrlas halyqtarymen bailanysty nyǵaitý úshin osyndai qadamǵa bardy. Latyn grafikasyna ótti. Eń bastysy, bizdiń elde de saiasi sheshim qabyldandy. Osy saiasi sheshimniń aiasynda máseleni ońtaily sheshýdiń jańa tehnologiialaryn, jańa ádisterin qoǵam bolyp birge jasaimyz degen oidamyz. Osy máseleni qaraityn memlekettik komissiianyń jumysyna jan-jaqty atsalysýymyz kerek. Onyń kemshiligi men ozyq jaqtaryn aityp otyrý qajet»,- dedi Erlan Sairov.
Al Angliia elinde joǵary bilim alyp kelgen jýrnalist-sarapshy Rýslan Jeldibai latyn qarpine kóshý arqyly bolashaq urpaq kez kelgen shet tilin ońai úirenip, úlken múmkindikterge jol ashady dep otyr.
«Meniń naqty senimim bar, latynǵa ótý qazaq tiliniń tildik qýatyn kúsheitedi. Máselen, Afrika elderiniń 80 paiyzǵa jýyǵy latyn qarpin qoldanady. Ol elder birden damyp ketken degen sóz emes. Al, bizdiń Qazaqstanymyz ol eldermen salystyrýǵa kelmeidi. Bizdiń jaǵdaiymyz, áleýetimiz joǵary. Álipbidiń qandai túrin tańdaimyz degende ony ǵalymdar sheshý kerek dep oilaimyn. Eń bastysy, latyn qarpine kóshýde qoǵamda birizdilik, biraýyzdylyq bar dep aitar edim. Qalǵan máseleler beiimdeý kezeńderinde komissiia tarapynan qosymsha sheshile bermek», - deidi Rýslan Jeldibai.
