Latyn álipbii - zaman talaby. Búgingi tańda onyń mańyzy asa zor. Jańa tehnologiia da, bolashaq innovatsiia da latyn tilinde. Endeshe kóshten kesh qalmaýymyz úshin barlyǵymyz atsalysýymyz qajet. Búgin OQO óńirlik kommýnikatsiialar qyzmetinde ótken brifingte ǵalym Aqjol Qalshabek osylai málimdedi.
Memleket basshysy aǵymdaǵy 2017 jyldyń 27 qazanynda qazaq tili álipbiin kirillitsadan latyn grafikasyna kóshirý týraly Jarlyqqa qol qoidy. Jarlyq negizinde 2025 jylǵa deiin latyn grafikasyna kóshý kezeń-kezeńimen júzege asyrylatyn bolady. Osyǵan bailanysty ótken baspasóz máslihatynda jan-jaqty pikirler aitylyp, talqyǵa salyndy.
Jańa álipbige kóshý týraly óz oiyn ortaǵa salǵan ǵalym Aqjol Qalshabek latyn álipbii qazaq halqynyń ulttyq rýhyn jańǵyrtatynyn aitty.
«Elbasymyzdyń «Bolashaqqa baǵdar: Rýhani jańǵyrý» maqalasynda halqymyzdyń ulttyq kodyn aiqyndaý, «Týǵan jer», «100 jańa esim» syndy ózekti taqyryptar qamtylǵan bolatyn. Osylardyń ishinde eń mańyzdysy latyn álipbiine kóshý máselesi edi. Latyn álipbii joǵymyzdy túgendep, joǵaltqanymyzdy tabýǵa úlken septigin tigizedi dep esepteimin. Osy rette búgingi qazaq qoǵamy latyn álipbiin tez meńgerýge daiyn bolýy kerek», - dedi Aqjol Qalshabek.
Sonymen qatar, brifingte sóz alǵan QR ózbekteri «Dostyq» qaýymdastyǵynyń tóraǵasy Ikram Hashimjanov Qazaqstandaǵy ózge etnos ókilderi de latyn álipbiine kóshý bastamasyn qoldaityndyǵyn jetkizdi.
«Búginde álem halqynyń 4 mlrd. 300 millionǵa jýyǵy latyn álipbiin qoldanady. Óitkeni, latyn tili ejelden ǵylym men bilim tili sanaldy. Demek, bul - búgingi zamannyń talaby. Bolashaq urpaq latyn álipbii arqyly tereń bilim alyp, ǵylymǵa umtylýy tiis», - dedi Ikram Akramuly.
Sondai-aq, baspasóz máslihatynda latyn álipbiiniń túrki halyqtarynyń basyn biriktiretin mańyzdy faktor ekendigi aityldy.
