Ulttyq akademiialyq kitaphanada «Til-Qazyna» respýblikalyq aqparattyq-tanymdyq gazetiniń tusaýkeseri ótti.
Elbasy N.Ə.Nazarbaevtyń 19 aqpandaǵy №637 Jarlyǵynda bekitilgen latynnegizdi qazaq álipbiin násihattaityn jáne jańa álipbige qatysty aqparatpen, tanymdyq materialdarmen bólisetin jańa álipbide jaryq kórip otyrǵan tuńǵysh basylym – «Til-Qazyna» respýblikalyq aqparattyq-tanymdyq gazeti aiyna eki ret shyǵady.
Sharaǵa Mádeniet jáne sport ministri Arystanbek Muhamediuly arnaiy qatysyp, gazet ujymyn jáne onyń shyǵýyna uiytqy bolyp otyrǵan Til saiasaty komiteti men Shaisultan Shaiahmetov atyndaǵy «Til-Qazyna» ulttyq ǵylymi-praktikalyq ortalyǵyna alǵysyn aityp, quttyqtady. Sonymen qatar gazettiń aldaǵy ýaqyttaǵy baǵyty talqylanyp, búgingi qoǵamnyń kún tártibinde turǵan emle máseleleri jaiynda usynys-pikirler tyńdaldy.
Gazet tanystyrylymy barysynda ótken ǵasyrda latyn álipbiinde jaryq kórgen qazaq basylymdarynyń tarihyna sholý jasalyp, latyn grafikasyndaǵy qazaq tili álipbiine kóshý kezeńderinde júrgizilip jatqan jumystar barysy pysyqtaldy.
Sharaǵa Parlament Májilisiniń depýtattary, Myrzatai Joldasbekov, Tólen Əbdik bastaǵan qalamger, ziialy qaýym ókilderi, ministrlik qyzmetkerleri, tiltanýshy ǵalymdar jáne BAQ ókilderi qatysty. Jazýshy Sultan Orazalin «Egemen Qazaqstan» gazetinde kúndelikti latyn álipbiimen shyǵatyn baǵandy oqyp, jattyǵyp qalǵanyn da tilge tiek etti. Endeshe «Til-Qazyna» gazetin de qalyń oqyrman jatyrqamai qabyldaidy dep senemiz.
Ularbek Nurǵalymuly,
"Egemen Qazaqstan"
.jpeg)