"Qazaqtelekom" kompaniiasynyń basshysy Qýanyshbek Esekeev kompaniialar toby keńsesin basyp alý áreketi týraly málimdedi, - dep habarlaidy Tengrinews.kz tilshisi.
"Almatyda jáne basqa qalalarda ornalasqan keńselerge buqaralyq kommýnikatsiia quraldaryn tartyp almaq bolǵan zańsyz kúshter shabýyl jasady. Bizdiń qyzmetkerler lańkesterge toitarys berip, barlyq júieniń úzdiksiz jumysyn qamtamasyz etti", - dep jazdy Esekeev Facebook-paraqshasynda.
Onyń aitýynsha, myna keńselerge shabýyl jasalǵan: negizgi bailanys ortalyǵy ornalasqan Almatydaǵy tehnologiialyq ǵimarat, Almaty jáne Taldyqorǵandaǵy "Almatytelekom" óńirlik telekommýnikatsiialar direktsiiasynyń ǵimarattary, Almaty, Taldyqorǵan, Aqtóbe jáne Shymkent qalalaryndaǵy KCell jáne Tele2 keńseleri.
"Sonymen qatar uialy bailanystyń 50-den asa bazalyq stantsiialary zaqymdandy, qalpyna keltirý jumystary júrgizilip jatyr. Lańkesterdiń kompaniialar tobyna keltirgen shyǵynyn baǵalaý 1 milliard teńgeden asady.
Eń kóp zardap shekken Kcell kompaniiasy - Almaty men Almaty oblysynda 6 Kcell dúkenin tonap ketken. Sonymen qatar, kompaniianyń eki úlken keńsesine de shabýyl jasaldy. "Qazaqtelekom" ádettegidei jumysyn jalǵastyryp jatyr", - dep túiindedi sózin kompaniia basshysy.
