Foto: charnsitr/Shutterstock/FOTODOM
Tek Qazaqstanda ǵana emes, bútkil álemde balalar Labýbý atty jumsaq oiynshyqqa qyzyǵyp, ata-analaryna alyp berýin ótinedi, al trendten qalmaityn qyz-jigitter ony sán úshin ustaidy. Qubyjyq tárizdi oiynshyqtyń úlken-kishi býynnyń birdei qyzyǵýshylyǵyn týǵyzatyndai ne qudyreti bar?
Eńbektegen baladan eńkeigen qariiaǵa deiin áleýmettik jelini belsendi qoldanatyn zamanda jelidegi marketingtiń «qurbany» bolmaý da qiyn shyǵar. Áitpese jai ǵana jumsaq oiynshyq munshalyqty tanymal bolar ma edi?!
Labýbý qaidan shyqty?
Labýbý (Labubu) ‒ 2015 jyly gonkongtik sýretshi-illiýstrator Kasing Lýng oilap tapqan personaj. Ol Lýng jasap shyǵarǵan kitiptar jáne oiynshyqtar seriiasyndaǵy qubyjyq-keiipker. Labýbý jumsaq oiynshyǵy ‒ úshkir qulaqty kózi úlken, toǵyz tisi aqsiyp kúlip turady.
2019 jyly Qytaidyń Pop Mart kompaniiasy onyń usaq oiynshyqtary men breloktaryn jasap shyǵara bastady.
Resmi dúkenderinde Labýbýdyń satylymynyń joǵarylyǵy sondai, onyń kóshirmesi de álem boiynsha óte kóp. Biraq onyń ataǵy aspandaǵan kez 2025 jyly k-pop janrynda án aitatyn koreialyq tanymal ánshi, Blackpink tobynyń solisti Lisa aksessýar retinde ustap shyqqannan bastaldy. Odan keiin Labýbýdy Riana, Kim Kardashian, Dýa Lipa siiaqty basqa da álemdik juldyzdar ustap, tanymaldyǵyn arttyrdy.
Foto: Blackpink tobynyń ánshisi Lisa/upmedia.mg
Oiynshyqtyń erekshelikteriniń biri ‒ ony ashqanda túrli tosynsyilarynyń bolýynda. Qorapty ashqanǵa deiin qandai oiynshyq kezdesetinin bilmeisiń. Áleýmettik jelide Labýbý qorabyn ashyp video túsirý trendke ainaldy. Bul da oiynshyqtyń tanymaldyǵyna áser etken bolýy múmkin.
Oiynshyqtyń quny qansha?
Pop Mart-tyń resmi dúkenderinde Labýbý 22 AQSh dollary shamasynda turady. Biraq onyń kóshirmeleri de ári túrli baǵada jetip artylady.
Labýbý ‒ stil
Labýbýdy marketologtar jai ǵana oiynshyq emes, obrazdy tolyqtyratyn aksessýarǵa, stil túrine, hobbige ainaldyryp jibergen. Personajdyń ár túrli kelbetindegi oiynshyqtarynan kollektsiia jinaý arqyly, sómkege aksessýar retinde taǵý, kilt qystyratyn brelok qylyp paidalaný, tipti kóliktiń áinegine ilip qoiý arqyly trendten qalyspaityn sánqoilar Labýbýdyń mańyzdylyǵyn tipti arttyrdy.
Sonymen bul oiynshyqpen kishkene balalar oinasa, eresek adamdar sán úshin paidalanatyn boldy.
Foto: Raimonda Kulikauskiene / Contributor/Getty Images
Pikirler qaishylyǵy
Dese de qoǵamda Labýbý personajdaryna, onyń tanymaldyǵyna kózqaras ár túrli. Bireýler ony «qorqynyshty qubyjyq bala psihikasyna ziian» dese, basqalary keiipkerlerdiń súikimdiligi de bar dep eseptep, ár túrli keiipkerlerdi kórip ósken búldirshinderdiń toleranttylyǵy artatynyn aitady.
Aita keteiik, sońǵy jyldary qubyjyq kelbettegi oiynshyqtar jii trendke shyǵatyn bolǵan. buǵan deiin álemde Haggi Vaggi esimdi qubyjyq-oiynshyqtar asa tanymal boldy.
