Qaraǵandyda kámelettik jasqa tolmaǵan eki ulyn uryp-soǵyp, 19 jastaǵy qyzyn zorlaǵan ógei áke 9 jylǵa sottaldy. Ol balalardy birneshe ai boiy dini joralǵy jasaýǵa kúshpen úiretpek bolǵan.
Ógei ákeniń qaharynan qoryqqan balalar sheshelerine tis jarmapty. Úidiń úlkeni boijetken qyz zorlanǵan soń ǵana, anasy politsiiaǵa shaǵymdanǵan.
Qorlyq kórgen bir úidiń úsh balasy. 5 jáne 10 jastaǵy eki ul men 19 jastaǵy qyz bala. Balalardyń aitýynsha, ógei áke olardy analary jumysqa ketkende taiaqtyń astyna alýdy ádetke ainaldyrǵan. Tipti úlken qyzdy zorlap, eki kún boiy páterde qamap ustaǵan, dep habarlady "Astana" arnasy.
Jábirlenýshi osydan keiin ǵana otbasyn zorlyqtan qutqarý úshin politsiiadan kómek surap, aryz jazypty. Bul otbasy 2 jarym jyl birge turǵan. Balalarǵa óreskel jábir kórsetken 45 jastaǵy ógei áke úsh birdei bappen aiyptaldy. Qazybek bi atyndaǵy aýdandyq sot ony 9 jylǵa sottady. Sottalýshy jazasyn joǵarǵy qaýipsizdiktegi túzetý mekemesinde óteidi.
"Bolǵan jaitty balalar ózderiniń anasyna da aitýǵa qoryqqan. Osy jyldyń sáýir aiynda jábirlenýshi oqiǵanyń mán-jaiyn aityp shaǵymdanǵan bolatyn", - dep túsindirdi Qaraǵandy oblystyq politsiia departamentiniń baspasóz hatshysy Janatai Sembekov.
19 jastaǵy jábirlenýshi qyz ógei ákesiniń dini bilimdi ǵalamtordan alǵanyn aitqan. Tergeý materialdaryna súiensek, sottalýshy tyiym salynǵan dindi ustanǵan.
Psihologtardyń aitýynsha, balalardyń kórgen qorlyqtaryn jasyrýy otbasyndaǵy tárbiege bailanysty. "Uiat bolady", nemese "Úlkenderge baǵyný kerek" degen sózder balanyń bolashaqta ózgeniń tegeýrinine tózýine ákelip soǵady deidi.
Politsiianyń málimetinshe, balalar analaryn qorǵaý úshin de zorlyqqa tózip kelgen. Sondyqtan qalanyń ortasynda turatyn otbasyndaǵy sumdyqty kórshileri de baiqamapty.
Qazir balalar anasymen birge. Otbasyna psihologiialyq kómek kórsetilýde.
