Qyzyn óltirgeni úshin sottalǵan ulybritaniialyq ushqysh Barakat Mohamed Almaty oblysyndaǵy eń joǵary qaýipsizdik mekemesinde jazasyn ótep jatyr. Bul týraly tilshi saýalyna IIM Qylmystyq-atqarý júiesi komiteti bergen jaýapta kórsetilgen, - dep habarlaidy Tengrinews.kz.
Barakat Mohamed 19 mamyrda Almaty oblysy boiynsha QAJD LA-155/12 mekemesine jetkizilgen. Ol meditsinalyq tekserýden ótti, al kelesi kúni, 20 mamyrda tizesiniń býyny aýyratynyn aityp, shaǵymdanǵan. QAJK málimeti boiynsha, naýqasty birden dáriger qarap, em taǵaiyndaǵan jáne hirýrgpen keńesýdi usynǵan.
"Qazirgi ýaqytta tutqyn mekemeniń oqshaýlaý bólimshesinde (karantinde bolý uzaqtyǵy 15 kún). Onyń kommýnaldyq-turmystyq jaǵdaiy talaptarǵa sáikes keledi", - dedi Qazaqstan IIM QAJK ókili.
Tutqynnan ustaý jaǵdaiyna qatysty shaǵymdar túsken joq. QAJK málimeti boiynsha, Barakat Mohamed jaǵdaiyna bailanysty shaǵymdana alady, usynystar men málimdeme jasap, sondai-aq ana tilinde hat jaza alady. Bul týraly qylmystyq-atqarý kodeksiniń 10-baby 1-bóliginiń 6-tarmaǵynda aitylǵan. Sondai-aq, zańda kózdelgen jaǵdailarda aýdarmashy qyzmetin paidalanýǵa múmkindigi bar.
Aita keteiik, 2019 jyldyń qazanynda Almatydaǵy InterContinental qonaqúiinde bala ólimi týraly habarlanǵan edi. Balany óltirdi degen kúdikpen Ulybritaniianyń 41 jastaǵy azamaty Mohamed Barakat ustalǵan bolatyn. Keiin ol kináli dep tanylyp, 20 jylǵa bas bostandyǵynan aiyrylǵan edi.
Aiyptaý aktisine sáikes, balany óltirýge erli-zaiypty arasyndaǵy janjal, ishimdik iship, esirtki qabyldaý sebep bolǵan. Qujattarda Barakat adam óltirgen kúni Almatyǵa ushyp kelip, otbasymen kezdeskeni aitylǵan. Keiin ol kafede ishimdik iship, tańǵy saǵat 7-de qonaqúi bólmesine oralǵan. Ol ushaqty basqara almaitynyn túsinip, áielinen kómek suraǵan. Áieli áýekompaniiaǵa qońyraý shalyp, kúieýi aýyryp qalǵanyn aitady. Bul kúdiktiniń ashýyn týdyrǵan. Ol áielin judyryǵymen urǵan sátte bala shýdan oianyp ketken. Ákesi ashýyn baladan alǵan. Kishkentai qyzdyń aman qalý múmkindigi bolmady, ony sot-meditsinalyq saraptama rastady, delingen qujattarda.
