Qyzylorda oblystyq Nartai Bekejanov atyndaǵy qazaq mýzykalyq drama teatry 2018 jyldyń tamyz aiynda Edinbýrg qalasynda ótetin «Frindj» halyqaralyq óner festivaline qazaqtyń halyq jazýshysy Ǵabit Músirepovtiń «Qozy Kórpesh-Baian Sulý» liro-epostyq dramasynyń jelisi boiynsha sahnalanǵan «Aqbaian» spektaklimen qatysady.
Halyqaralyq «Frindj» («Fringe») festivali 1947 jyldan bastap jyl saiyn tamyz aiynda Shotlandiia elinde ótkizilip keledi. Álemdegi eń joǵary deńgeide ótetin óner festivalderiniń biri. Festivalge álemniń 50 memleketinen 50000 ónerpazdar qatysady jáne 3000-ǵa jýyq qoiylymdar kórsetiledi.
Syr teatry usynǵaly otyrǵan «Aqbaian» spektaklin qoiǵan rejisser teatrdyń kórkemdik jetekshisi, Qazaqstannyń eńbek sińirgen qairatkeri Ámir-Temir Husein Júsipuly. Kórkemdegen sýretshi Nurken Qalymbetov. Spektaklde óner kórsetetin artisterdiń basym kópshiligi jastar. Atap aitsaq, Aqbaian rolinde – Zarina Kenjeáli, Aiym Begmat, Qozy rolinde – Sanat Júzbai, Qodar – Qanat Arhabaev jáne Qarabai rolinde – Qazaqstan Jastar Odaǵy «Serper» syilyǵynyń laýreaty Baqytbek Temirbekov, Sarybai – Syrym Ábdrazaqov, Maqpal – Qazaqstan Respýblikasy Mádeniet ministrliginiń Mádeniet qairatkeri tósbelgisiniń iegeri Zalipa Tólepova jáne Kúnekei rolinde – Aqtolqyn Tóleýova.
Mahabbat hikaiasyna toly elý minýttyq qoiylymda – besikte atastyrylyp, biraq joldary ekige aiyrylǵan, on jeti jyldan soń qaita júzdesken qos ǵashyqtyń taǵdyry sýretteledi. Bir-birin kórýge yntyq júrekter qaita tabysady. Alaida, olardyń qosylýyna kedergi bar. Biri – qalaida dúniesin toltyrýdy kózdegen qyz ákesi Qarabai. Ekinshisi – Baianǵa ǵashyq, tek kúshine sengen Qodar. Spektaklde qazaqtyń salt-dástúrleri - ulttyq bii oryndalyp, asyq, arqan-tartys sekildi ulttyq oiyndar oinalyp, qoiylymnyń óne boiynan qazaqtyń ulttyq naqyshtaǵy kiimderi kórinis tabady.
"Qazaqtyń ulttyq máiegi men mádeni qundylyǵy toǵysqan «Aqbaian» spektaklimen álem sahnasyna jol tartyp, barsha qazaq óneriniń júgin arqalaǵan Nartai Bekejanov atyndaǵy qazaq drama teatry úshin bul - úlken tarihi qubylys jáne mártebeli mindet bolyp tabylady", - dedi teatrdyń kórkemdik jetekshisi, Qazaqstannyń eńbek sińirgen qairatkeri Ámir-Temir Husein Júsipuly.
Jarty ǵasyrdan astam tarih qoinaýyndaǵy Nartai Bekejanov atyndaǵy qazaq mýzykalyq drama teatrynyń repertýarynda túrli janrdaǵy kórermen talǵamyna sai sapaly qoiylymdar qatary bar.
Sonymen qatar, teatrdyń shyǵarmashylyq quramynda jastar trýppasy, qýyrshaq toby jáne dramalyq ujymdy qosqanda barlyǵy 50-ge jýyq artister qyzmet etedi.
Teatr 63 jyldyq maýsymynda bes memleketke úlken gastroldik saparmen baryp, qazaq óneriniń mártebesin kóterip, mereiin asqaqtatty. Onyń ishinde, Tatarstan, Túrkiia, Ázerbaijan jáne Ulybritaniia elinderinde ótken óner dodalaryna qatysyp, úlken jetistiktermen oraldy.
