Qyzylordalyq Erjan Arqabaev Túrkiia elinde dombyra úirenýge qulshynys bildirgen azamattarǵa arnalǵan arnaiy kýrs ashty. Oǵan qosa túrkitildes elderdiń ónerpaz jastarynan «Otaý» ult aspaptar ansamblin qurdy, dep habarlaidy QazAqparat.
Erjannyń Anadoly jerine kelýi birqatar oqiǵalar sebepshi boldy. 2013-2014 jyldary ol Qyzylorda oblystyq filarmoniiasynyń atynan baýyrlas eldegi Naýryz festivaline qatysty. Ony TÚRKSOI uiymynyń uiymdastyrǵan bolatyn. Festival barysynda «Aqmeshit» folklorlyq ansambli quramynda óner kórsetti. Qyzylordalyq ónerpazdar týysqan eldiń birneshe belgili qalasyn aralady. Kóne zamannan kele jatqan qazaq óneri men mýzykasyn keńinen nasihattady. Gastroldik saparda júrgen sátinde Túrkiiada bilimin jetildirý týraly oilap, sol maqsatqa jetý jolynda eńbek etti. Osy maqsatta aldymen arnaiy kýrsqa qatysyp, túrik tilin meńgeredi. 2015 jyly Túrkiianyń Konia qalasyndaǵy Nedjmettin Erbaqan ýniversitetiniń magistranty atandy.
«Alǵa qoiǵan maqsatym qazaq kúilerin eýropalyq mánerde qaita jandandyrý. Osy baǵytta baýyrlas elde úlken múmkindikter týyp tur. Túrkiiadaǵy ýniversitet qabyrǵasynda túrli sharalarǵa qatysyp júrmin. Bul jerdegi jergilikti halyq qazaqtyń qara dombyrasyna erekshe qyzyǵýshylyq tanytatynyn baiqaimyn. Joǵary deńgeidegi kontsertterde óner kórsettim», dedi Erjan.
Ónerpaz eki aida sol eldegi 40 qalany aralap, qazaq ónerin kópshilikke pash etti. Atalǵan sharalardyń birine Túrkiia prezidenti Redjep Taiyp Erdoǵannyń ózi qatysqan. Ol Erjannyń ónerine erekshe iltipat bildirdi.
«Túrkiiada «Esimsizder», «Direnish Qaratai» filmderi teledidar arqyly kópshilikke kórsetiýlde. Maǵan atalǵan filmderge saýndtrek jazý múmkindigi týdy. Al Konia qalasyndaǵy prodiýserlik ortalyǵymen birlesip, «Dombyra túrik rýhy» degen ataýmen qazaq tarihi kúileriniń digital albomyn shyǵardym. Endi qazaq kúilerin tanytý, dáripteý, nasihattaý maqsatynda albom SD formatyn jasaý oiymda bar», dedi ol.
Erjan túrkitildes elderden oqýǵa kelgen ónerpaz stýdentterdi jinap, «Otaý» ult aspaptar ansamblin qurdy. Ankara qalasynda dombyra kýrsyn ashty. Daryndy ónerpazdyń Túrki áleminiń mýzykalyq aspaptary arqyly oryndaǵan «Adai» kúiine túsirgen beinebaiany jýyq arada jaryqqa shyqty.
Erjan 1988 jyly dúniege kelgen. 2003 jyly Qazanǵap atyndaǵy Qyzylorda mýzykalyq kolledjine túsip, bilimin jetildirdi. Odan ári Astana qalasyndaǵy Qazaq Ulttyq óner ýniversitetin úzdik aiaqtady. Alǵashqy jumysyn oblystyq filarmoniia janynan qurylǵan «Aqmeshit» folklorlyq ansamblinde bastady. Sonymen qatar ózi tálim alǵan mýzykalyq kolledjde qyzmet atqardy.
