قىزىلوردالىق ەرجان ارقاباەۆ تٷركييا ەلٸندە دومبىرا ٷيرەنۋگە قۇلشىنىس بٸلدٸرگەن ازاماتتارعا ارنالعان ارنايى كۋرس اشتى. وعان قوسا تٷركٸتٸلدەس ەلدەردٸڭ ٶنەرپاز جاستارىنان «وتاۋ» ۇلت اسپاپتار انسامبلٸن قۇردى, دەپ حابارلايدى قازاقپارات.
ەرجاننىڭ انادولى جەرٸنە كەلۋٸ بٸرقاتار وقيعالار سەبەپشٸ بولدى. 2013-2014 جىلدارى ول قىزىلوردا وبلىستىق فيلارمونيياسىنىڭ اتىنان باۋىرلاس ەلدەگٸ ناۋرىز فەستيۆالٸنە قاتىستى. ونى تٷركسوي ۇيىمىنىڭ ۇيىمداستىرعان بولاتىن. فەستيۆال بارىسىندا «اقمەشٸت» فولكلورلىق انسامبلٸ قۇرامىندا ٶنەر كٶرسەتتٸ. قىزىلوردالىق ٶنەرپازدار تۋىسقان ەلدٸڭ بٸرنەشە بەلگٸلٸ قالاسىن ارالادى. كٶنە زاماننان كەلە جاتقان قازاق ٶنەرٸ مەن مۋزىكاسىن كەڭٸنەن ناسيحاتتادى. گاسترولدٸك ساپاردا جٷرگەن سەتٸندە تٷركييادا بٸلٸمٸن جەتٸلدٸرۋ تۋرالى ويلاپ, سول ماقساتقا جەتۋ جولىندا ەڭبەك ەتتٸ. وسى ماقساتتا الدىمەن ارنايى كۋرسقا قاتىسىپ, تٷرٸك تٸلٸن مەڭگەرەدٸ. 2015 جىلى تٷركييانىڭ كونيا قالاسىنداعى نەدجمەتتين ەرباقان ۋنيۆەرسيتەتٸنٸڭ ماگيسترانتى اتاندى.
«العا قويعان ماقساتىم قازاق كٷيلەرٸن ەۋروپالىق مەنەردە قايتا جانداندىرۋ. وسى باعىتتا باۋىرلاس ەلدە ٷلكەن مٷمكٸندٸكتەر تۋىپ تۇر. تٷركيياداعى ۋنيۆەرسيتەت قابىرعاسىندا تٷرلٸ شارالارعا قاتىسىپ جٷرمٸن. بۇل جەردەگٸ جەرگٸلٸكتٸ حالىق قازاقتىڭ قارا دومبىراسىنا ەرەكشە قىزىعۋشىلىق تانىتاتىنىن بايقايمىن. جوعارى دەڭگەيدەگٸ كونتسەرتتەردە ٶنەر كٶرسەتتٸم», دەدٸ ەرجان.
ٶنەرپاز ەكٸ ايدا سول ەلدەگٸ 40 قالانى ارالاپ, قازاق ٶنەرٸن كٶپشٸلٸككە پاش ەتتٸ. اتالعان شارالاردىڭ بٸرٸنە تٷركييا پرەزيدەنتٸ رەدجەپ تايىپ ەردوعاننىڭ ٶزٸ قاتىسقان. ول ەرجاننىڭ ٶنەرٸنە ەرەكشە ٸلتيپات بٸلدٸردٸ.
«تٷركييادا «ەسٸمسٸزدەر», «ديرەنيش قاراتاي» فيلمدەرٸ تەلەديدار ارقىلى كٶپشٸلٸككە كٶرسەتٸۋلدە. ماعان اتالعان فيلمدەرگە ساۋندترەك جازۋ مٷمكٸندٸگٸ تۋدى. ال كونيا قالاسىنداعى پروديۋسەرلٸك ورتالىعىمەن بٸرلەسٸپ, «دومبىرا تٷرٸك رۋحى» دەگەن اتاۋمەن قازاق تاريحي كٷيلەرٸنٸڭ digital البومىن شىعاردىم. ەندٸ قازاق كٷيلەرٸن تانىتۋ, دەرٸپتەۋ, ناسيحاتتاۋ ماقساتىندا البوم سD فورماتىن جاساۋ ويىمدا بار», دەدٸ ول.
ەرجان تٷركٸتٸلدەس ەلدەردەن وقۋعا كەلگەن ٶنەرپاز ستۋدەنتتەردٸ جيناپ, «وتاۋ» ۇلت اسپاپتار انسامبلٸن قۇردى. انكارا قالاسىندا دومبىرا كۋرسىن اشتى. دارىندى ٶنەرپازدىڭ تٷركٸ ەلەمٸنٸڭ مۋزىكالىق اسپاپتارى ارقىلى ورىنداعان «اداي» كٷيٸنە تٷسٸرگەن بەينەبايانى جۋىق ارادا جارىققا شىقتى.
ەرجان 1988 جىلى دٷنيەگە كەلگەن. 2003 جىلى قازانعاپ اتىنداعى قىزىلوردا مۋزىكالىق كوللەدجٸنە تٷسٸپ, بٸلٸمٸن جەتٸلدٸردٸ. ودان ەرٸ استانا قالاسىنداعى قازاق ۇلتتىق ٶنەر ۋنيۆەرسيتەتٸن ٷزدٸك اياقتادى. العاشقى جۇمىسىن وبلىستىق فيلارمونييا جانىنان قۇرىلعان «اقمەشٸت» فولكلورلىق انسامبلٸندە باستادى. سونىمەن قاتار ٶزٸ تەلٸم العان مۋزىكالىق كوللەدجدە قىزمەت اتقاردى.
