7 mamyrda Qyzylordada bolǵan tóbeles kezinde qaza tapqan úsh adamnyń arasynda qyzylordalyq sportshy Qýandyq Júsip te bolǵan, - dep habarlaidy Tengrinews.kz agenttigi.
Qýandyqty birneshe jyldan beri biletin qazaqstandyq kásipqoi boksshy, álem chempionatynyń eki dúrkin kúmis júldegeri, qazirgi WBA Gold nusqasy boiynsha álem chempiony Qamshybek Qońqabaev áriptesi qaitys bolǵanyn rastady.
"Iá, ókinishke qarai, kúni keshe Qyzylordada bolǵan atysta qaza tapqandardyń arasynda Qýandyq Júsip te boldy. Onymen 2012 jyldan beri tanyspyz. Bir emes, birneshe ret birge jattyǵyp, túrli boks lagerlerine bardyq. Bulai bolǵany óte ókinishti", - dedi boksshy.
Qýandyq Júsip 1995 jyly Qyzylorda oblysy, Jańaqorǵan aýdanynda dúniege kelgen. Ol bokstan Qazaqstannyń sport sheberi.
Bapker Seiitjan Tókenovtiń aitýynsha, Qýandyq birneshe ret júldeli oryn alyp, bolashaǵynan úlken úmit kútiretin sportshy bolǵan.
"Ol bokstan túrli halyqaralyq týrnirlerge qatysty, birneshe ret júldeli oryn aldy. Mysaly, Shymkentte ótken Ábdisamal Nurmahanovty eske alýǵa arnalǵan halyqaralyq týrnirde Qýandyq úshinshi oryndy ielendi. Sabyrly, namaz oqityn, úsh bala tárbielep otyrǵan adam edi. Jaqynda qala bazarlarynyń birine kúzetshi bolyp jumysqa ornalasqan. Bul jaǵdaiǵa qalai túskenin bilmeimiz. Jurt túrli nusqany aityp júr, politsiia ne bolǵanyn anyqtaidy dep úmittenemiz", - dep qosty ol.
Eske salaiyq, Qyzylordadaǵy atys 7 mamyrda bolǵan. Saldarynan úsh adam qaza taýyp, taǵy ekeýi túrli jaraqattarmen aýrýhanaǵa jetkizilgen. Politseiler 6 kúdiktini ustady, taǵy tórteýine izdeý jariialanǵan.
