7 مامىردا قىزىلوردادا بولعان تٶبەلەس كەزٸندە قازا تاپقان ٷش ادامنىڭ اراسىندا قىزىلوردالىق سپورتشى قۋاندىق جٷسٸپ تە بولعان, - دەپ حابارلايدى Tengrinews.kz اگەنتتٸگٸ.
قۋاندىقتى بٸرنەشە جىلدان بەرٸ بٸلەتٸن قازاقستاندىق كەسٸپقوي بوكسشى, ەلەم چەمپيوناتىنىڭ ەكٸ دٷركٸن كٷمٸس جٷلدەگەرٸ, قازٸرگٸ WBA Gold نۇسقاسى بويىنشا ەلەم چەمپيونى قامشىبەك قوڭقاباەۆ ەرٸپتەسٸ قايتىس بولعانىن راستادى.
"يە, ٶكٸنٸشكە قاراي, كٷنٸ كەشە قىزىلوردادا بولعان اتىستا قازا تاپقانداردىڭ اراسىندا قۋاندىق جٷسٸپ تە بولدى. ونىمەن 2012 جىلدان بەرٸ تانىسپىز. بٸر ەمەس, بٸرنەشە رەت بٸرگە جاتتىعىپ, تٷرلٸ بوكس لاگەرلەرٸنە باردىق. بۇلاي بولعانى ٶتە ٶكٸنٸشتٸ", - دەدٸ بوكسشى.
قۋاندىق جٷسٸپ 1995 جىلى قىزىلوردا وبلىسى, جاڭاقورعان اۋدانىندا دٷنيەگە كەلگەن. ول بوكستان قازاقستاننىڭ سپورت شەبەرٸ.
باپكەر سەيٸتجان تٶكەنوۆتٸڭ ايتۋىنشا, قۋاندىق بٸرنەشە رەت جٷلدەلٸ ورىن الىپ, بولاشاعىنان ٷلكەن ٷمٸت كٷتٸرەتٸن سپورتشى بولعان.
"ول بوكستان تٷرلٸ حالىقارالىق تۋرنيرلەرگە قاتىستى, بٸرنەشە رەت جٷلدەلٸ ورىن الدى. مىسالى, شىمكەنتتە ٶتكەن ەبدٸسامال نۇرماحانوۆتى ەسكە الۋعا ارنالعان حالىقارالىق تۋرنيردە قۋاندىق ٷشٸنشٸ ورىندى يەلەندٸ. سابىرلى, ناماز وقيتىن, ٷش بالا تەربيەلەپ وتىرعان ادام ەدٸ. جاقىندا قالا بازارلارىنىڭ بٸرٸنە كٷزەتشٸ بولىپ جۇمىسقا ورنالاسقان. بۇل جاعدايعا قالاي تٷسكەنٸن بٸلمەيمٸز. جۇرت تٷرلٸ نۇسقانى ايتىپ جٷر, پوليتسييا نە بولعانىن انىقتايدى دەپ ٷمٸتتەنەمٸز", - دەپ قوستى ول.
ەسكە سالايىق, قىزىلورداداعى اتىس 7 مامىردا بولعان. سالدارىنان ٷش ادام قازا تاۋىپ, تاعى ەكەۋٸ تٷرلٸ جاراقاتتارمەن اۋرۋحاناعا جەتكٸزٸلگەن. پوليتسەيلەر 6 كٷدٸكتٸنٸ ۇستادى, تاعى تٶرتەۋٸنە ٸزدەۋ جارييالانعان.
