Qyzylorda oblysynda Kongo-Qyrym qandy bezgegine shaldyǵý jaǵdaiy tirkeldi. Mundai oqiǵa buǵan deiin qys mezgilinde oryn alǵan emes, dep habarlaidy "Ult aqparat".
Jańaqorǵan aýdany Quttyqoja aýyly turǵyny kongo-qyrym qandy bezgenine shaldyqty. Naýqastyń diagnozy zerthanalyq jolmen naqtylandy. Qazirgi tańda ol Jańaqorǵan aýdandyq ortalyq aýrýhanasynyń juqpaly aýrýlar bóliminde em qabyldaýda. Naýqas mal sharýashylyǵymen ainalysady, jaldanyp mal baǵady.
«Jedel habarlama kelip túsken ýaqyttan bastap epidemiologiialyq top quryldy. Aýrý oshaǵynda indetke qarsy is-sharalar kesheni tolyǵymen oryndaldy. Aýla, kúl-qoqys tastaityn oryn, naýqas mal baǵatyn sharýa qojalyǵyndaǵy oshaqta epidemiologiialyq top mamandarymen zalalsyzdandyrý jumystary tolyq júrgizildi. Aýylsharýashylyǵy maldary kenege qarsy «Kreolin-H» preparatymen zalalsyzdandyryldy. Oshaqta mal qora men aýylsharýashylyq maldarynan keneler anyqtalǵan joq. Epidemiologiialyq zertteýler barysynda naýqaspen qarym-qatynasta 9 adam bolǵany anyqtaldy. Olardyń barlyǵy da meditsinalyq baqylaýǵa alyndy. Onyń ishinde naýqaspen tyǵyz qatynasta bolǵan jubaiy men qyzy aýdanaralyq aýrýhananyń juqpaly aýrýlar bólimine jatqyzyldy. Qazirgi tańda profilaktikalyq tolyq emin alyp, úiine shyǵaryldy. Naýqasqa standartty algoritm boiynsha em taǵaiyndalyp, júrgizildi. Búgingi kúni naýqastyń jaǵdaiy qalypty», - dep málim etti Qyzylorda oblysynyń taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Áliia Ábdiqaiymova.
Áliia Ábdiqaiymovanyń aitýynsha, kene shaǵý jaǵdaiy oryn alǵanda mindetti túrde turǵylyqty meken-jaiyńyz boiynsha meditsinalyq kómekke júginýińiz qajet. Kómekke erte júginý arqyly aýrýdyń asqynýyn boldyrmaýǵa bolady.
Negizinde keneler naýryz ben qyrkúiek aralyǵynda belsendi, al mamyr-shilde ailarynda olar kúsheie túsedi. Alaida kene shaǵý derekteri qys mezgilinde de kezdesip jatady. Qazirgi tańda Qyzylorda oblysynyń ońtústigindegi Jańaqorǵan jáne Shieli aýdandarynda aýa raiy jylylyǵymen erekshelenip tur. Sondyqtan keneler áli de belsendiligin joiǵan joq.
Budan buryn Qyzylordada kúidirgi aýrýynyń 60 oshaǵy bar ekenin habarlaǵan bolatynbyz.
