18 aqpanǵa qaraǵan túni Qyzylorda qalasy ál-Farabi shaǵyn aýdanyndaǵy ýaqytsha baspanadan órt shyǵyp, besiktegi sábi qaitys boldy. Úi ishinde sábimen birge onyń tórt ápkesi jáne anasy bolǵan. Olar úiden shyǵyp úlgergen. Bul oqiǵany Qyzylorda oblystyq tótenshe jaǵdailar departamenti órt sóndirý jáne avariialyq-qutqarý jumystary qyzmetiniń baspasóz hatshysy Áliia Erejepova rastady, dep habarlaidy Azattyq.
– Ýaqytsha turǵyn úiden 00:50 minýtta órt sóndirý qyzmetine shaqyrtý túsken. Bizdiń qyzmetkerler basyna barǵan kezde úi tolyǵymen janyp jatqan. Úi ishinen 2020 jyly týǵan sábidiń besikte jatqan kúii óli denesin tapqan. Úide odan bólek tórt qyz bala jáne anasy bolǵan. Ákesi jol júrip ketken. Anasy tórteýin qutqaryp úlgergen ǵoi. Shamasy uiyqtap jatqan bolý kerek, – dedi Erejepova.
Áliia Erejepovanyń sózinshe, balalardyń anasyn úsh paiyz kúiik shalǵan, 2018 jyly týǵan qyz balanyń bir paiyzy kúiik shalǵany anyqtalǵan. Qalǵan úsh bala aman. Órttiń shyǵý sebebi anyqtalyp jatyr.
Baspasóz hatshysynyń aitýynsha, ázirge belgili aqparat boiynsha bes balanyń beseýi de - qyz. Biraq bul aqparat naqtylaýdy qajet etedi deidi ol.
Áleýmettik jelide órt sóndirý qyzmetkeriniń oqiǵa ornynan túsirilgen baiandamasy tarady. Onda qyzmetker oqiǵa ornyna 00:59 ýaqytta kelgenin, 01:23 ýaqytynda órttiń sóndirilgenin, úidiń 11 sharshy metr ekeni aitylady.
«Órt ornyna oblystyq tótenshe jaǵdailar departamentinen 4 tehnikamen 16 qyzmetker bardy. Jalynǵa oranǵan úi ishinen áiel men tórt qyzy shyǵyp úlgergen. Jalyn 01.23-te tolyǵymen sóndirildi. Úiden 2019 jyly dúniege kelgen sharananyń máiiti tabyldy. Órttiń shyǵý sebebi tekserilip jatyr», - dep málimdedi Qyzylorda oblystyq Tótenshe jaǵdailar departamenti órt sóndirý jáne avariialyq-qutqarý jumystary qyzmeti.
Qazaqstanda ýaqytsha baspanalardyń órtke oranýy jii bolady. 2019 jyly 4 aqpanǵa qaraǵan túni Astana qalasynyń (qazirgi Nur-Sultan) shetindegi Kóktal-1 eldimekenindegi shaǵyn úiden órt shyǵyp, bir úidiń bes qyzy qazaǵa ushyrady. Osy oqiǵadan keiin elde kóp balaly áielderdiń narazylyǵy kúsheidi. Olar áleýmettik kómekti kúsheitýdi, turǵyn-úi máselesin sheshýdi talap etti.
Eskertý: Qyzyljarma shaǵyn aýdany ál-Farabi móltek aýdany bolyp ózgertildi. Tótenshe jaǵdailar departamenti taratqan aqparatta shaǵyn aýdan aty "Qyzyljarma" dep atalǵan. Oqiǵa ornyna barǵan tilshi úidiń ál-Farabi móltek aýdanyna qaraitynyn aitty.
