Qyzylorda oblysynda toihanalar kásipkerlik jáne óndiris oryndaryna ainala bastady, dep habarlaidy "Ult aqparat".
Búgingde oblysta jalpy sany 128 toihana bar. Pandemiiaǵa bailanysty tótenshe jaǵdai men karantindik sharalarǵa sáikes bas memlekettik sanitariialyq dárigeriniń qaýlysymen toihanalardyń qyzmetine tyiym salyndy. Bul qaýipti derttiń aldyn alý jáne halyqtyń qaýipsizdigin qamtamasyz etý maqsatynda qabyldanyp otyr.
Qyzmetine tyiym salynǵan kásipkerlik nysandaryn qaita jandandyrý jáne basqa salalarǵa baǵyttaý maqsatynda oblys ákimdiginiń «Qyzylorda oblysynyń 2023 jylǵa deiingi ekonomikalyq damý jospary» ázirlendi.
«Jospar aiasynda 10-nan asa toihana qyzmetterin ózge salalarǵa baǵyttady. Atap aitqanda, Aral aýdanyndaǵy «Aqniet» toihanasy kiim-keshek satatyn saýda nysanyna ainaldy. Al, Qarmaqshy aýdanyndaǵy «Altyn Ǵasyr» toihanasy endi otbasyǵa arnalǵan kiimder satatyn saýda ortalyǵy boldy. Sol aýdandaǵy «Málike Ana» toihanasy endi balalar oiyn alańy men konditerlik ónimder óndiretin tsehyna aýystyryldy. Qyzylorda qalasynda ornalasqan «Ulytaý» toihanasy shyryndar men sýsyndar óndirse, «Orda» toihanasy avtomattandyrylǵan lavash shyǵarý óndirisin iske qosady», - dep málim ettti oblystyq kásipkerlik jáne týrizm basqarmasy.
Sondai-aq, birqatar toihanalar óz baǵytyn qus sharýashylyǵyna aýystyrmaq niette. Oǵan qosa óz isin qurylys materialdary dúkenine, meditsina ortalyǵyna qaita baǵyttap jatqan toihanalar bar.
