Qyzylordada Halyq qaharmany Roza Baǵlanova atyndaǵy respýblikalyq «Aqmańdailym» ánshiler baiqaýy ótti, dep habarlaidy "Ult aqparat".
Bul baiqaý ústimizdegi jyly tórtinshi márte ótkizilip otyr. Baiqaýda Almaty, Astana, Shymkent, Kókshetaý, Semei qalalary men Batys Qazaqstan, Atyraý, Aqtóbe, Túrkistan, Jambyl, Qostanai, Qyzylorda oblystarynan kelgen barlyǵy 20 úmitker baqtaryn synady.
Konkýrsta Qazaqstannyń eńbek sińirgen qairatkeri, kompozitor Keńes Dúisekeev, Qazaqstannyń eńbek sińirgen qairatkerleri Erjan Abdrahmanov, Sembek Jumaǵaliev, R. Baǵlanovanyń kelini Maral Baǵlanova, jergilikti ánshi Kúlánda Qalymbetovalar tórelik etti.
«Syr óńiri ótkizgen árbir baiqaýda naǵyz talanttardy tanýǵa tyrysady. Osylaisha naǵyz talanttarǵa jol ashylady», - dedi belgili kompozitor Keńes Dúisekeev.
Ádilqazylar alqasynyń sheshimimen bas báige Astana qalasynan kelgen Aidyn Jumabaevqa buiyryp, oǵan Baǵlanovtar otbasy taǵaiyndaǵan 500 myń teńgeniń sertifikaty men Halyq qaharmanynyń beinesindegi statýetka tabys etildi. Birinshi orynǵa qyzylordalyq Raqymjan Maqsatbaev ie bolsa, ekinshi orynǵa aqtóbelik Nurtas Omarov pen Batys Qazaqstannan kelgen Erqat Jaqashev laiyq dep tanyldy. Úzdik úshtikti Qyzylorda oblysynyń Aral aýdanynan kelgen Sabyrjan Kólbaev pen Túrkistan oblysynyń «Saryn» triosy túiindedi.
Ereje boiynsha konkýrsta ánshiler eki án oryndady. Alǵashqy týrda ánshi R.Baǵlanovanyń repertýaryndaǵy ánderden bir týyndyny kópshilik nazaryna usynsa, kelesi týrda Qazaqstan kompozitorlarynyń qazirgi tańdaǵy zamanaýi jazylǵan bir shyǵarma tyńdarmanǵa jol tartty.
Konkýrstyń gala-kontserti búgin ánshiniń týǵan jeri Qazaly aýdanynda ótedi.
