قىزىلوردادا حالىق قاھارمانى روزا باعلانوۆا اتىنداعى رەسپۋبليكالىق «اقماڭدايلىم» ەنشٸلەر بايقاۋى ٶتتٸ, دەپ حابارلايدى "ۇلت اقپارات".
بۇل بايقاۋ ٷستٸمٸزدەگٸ جىلى تٶرتٸنشٸ مەرتە ٶتكٸزٸلٸپ وتىر. بايقاۋدا الماتى, استانا, شىمكەنت, كٶكشەتاۋ, سەمەي قالالارى مەن باتىس قازاقستان, اتىراۋ, اقتٶبە, تٷركٸستان, جامبىل, قوستاناي, قىزىلوردا وبلىستارىنان كەلگەن بارلىعى 20 ٷمٸتكەر باقتارىن سىنادى.
كونكۋرستا قازاقستاننىڭ ەڭبەك سٸڭٸرگەن قايراتكەرٸ, كومپوزيتور كەڭەس دٷيسەكەەۆ, قازاقستاننىڭ ەڭبەك سٸڭٸرگەن قايراتكەرلەرٸ ەرجان ابدراحمانوۆ, سەمبەك جۇماعاليەۆ, ر. باعلانوۆانىڭ كەلٸنٸ مارال باعلانوۆا, جەرگٸلٸكتٸ ەنشٸ كٷلەندا قالىمبەتوۆالار تٶرەلٸك ەتتٸ.
«سىر ٶڭٸرٸ ٶتكٸزگەن ەربٸر بايقاۋدا ناعىز تالانتتاردى تانۋعا تىرىسادى. وسىلايشا ناعىز تالانتتارعا جول اشىلادى», - دەدٸ بەلگٸلٸ كومپوزيتور كەڭەس دٷيسەكەەۆ.
ەدٸلقازىلار القاسىنىڭ شەشٸمٸمەن باس بەيگە استانا قالاسىنان كەلگەن ايدىن جۇماباەۆقا بۇيىرىپ, وعان باعلانوۆتار وتباسى تاعايىنداعان 500 مىڭ تەڭگەنٸڭ سەرتيفيكاتى مەن حالىق قاھارمانىنىڭ بەينەسٸندەگٸ ستاتۋەتكا تابىس ەتٸلدٸ. بٸرٸنشٸ ورىنعا قىزىلوردالىق راقىمجان ماقساتباەۆ يە بولسا, ەكٸنشٸ ورىنعا اقتٶبەلٸك نۇرتاس وماروۆ پەن باتىس قازاقستاننان كەلگەن ەرقات جاقاشەۆ لايىق دەپ تانىلدى. ٷزدٸك ٷشتٸكتٸ قىزىلوردا وبلىسىنىڭ ارال اۋدانىنان كەلگەن سابىرجان كٶلباەۆ پەن تٷركٸستان وبلىسىنىڭ «سارىن» تريوسى تٷيٸندەدٸ.
ەرەجە بويىنشا كونكۋرستا ەنشٸلەر ەكٸ ەن ورىندادى. العاشقى تۋردا ەنشٸ ر.باعلانوۆانىڭ رەپەرتۋارىنداعى ەندەردەن بٸر تۋىندىنى كٶپشٸلٸك نازارىنا ۇسىنسا, كەلەسٸ تۋردا قازاقستان كومپوزيتورلارىنىڭ قازٸرگٸ تاڭداعى زاماناۋي جازىلعان بٸر شىعارما تىڭدارمانعا جول تارتتى.
كونكۋرستىڭ گالا-كونتسەرتٸ بٷگٸن ەنشٸنٸڭ تۋعان جەرٸ قازالى اۋدانىندا ٶتەدٸ.
