Qyzylordalyq sýretshi, Qazaqstan Sýretshiler odaǵynyń múshesi Rahym Shegebaev shyǵarmashylyǵynyń 45 jyldyǵyna arnalǵan jeke kórmesinde «Táýelsizdikke tartý» atty kitabynyń tusaýkeser rásimi ótti.
Qyzylorda oblysynyń ákimi Qyrymbek Kósherbaev qylqalam sheberin quttyqtap, jańa shyǵarmashylyq tabystar tiledi.
«Adamzat órkenietimen birge jasap kele jatqan, óz bastaýyn ǵasyrlar qoinaýynan alatyn Syrdyń qasietti de qasterli topyraǵy talai talantty tulǵalardy dúniege ákeldi. Qazaqtyń tuńǵysh ulttyq drama teatrynyń sahna kórkemdeýshisi bolǵan halyq sheberi Látipa Hojyqovadan bastap, aǵaiyndy Qojahmet jáne Qulahmet Hojyqovtar, Sahi Romanov pen Salihitdin Aitbaevtar qazaq beineleý óneriniń damýyna úles qosyp, qaitalanbas óner órnegimen airyqsha iz qaldyrdy. Árbir sýretshiniń, árbir kartinanyń ózindik alǵan baǵasy, ózindik tarihi máni, urpaq qajettiligine jaratarlyq qundylyǵy bar. Sonyń bir dáleli - Rahym Shegebaevtyń shyǵarmalary tek Qazaqstanda ǵana emes, shetelde de tanymal, Kanada, AQSh, Portýgaliia, Vengriiada da qoiylǵan»,-dedi aimaq basshysy.
Rahym Shegebaev – realistik kórkemsýret mektebiniń ókili. Onyń shyǵarmashylyǵy Túrki áleminiń abyzy Qorqyt ata jáne Syr óńiriniń tabiǵatymen úndes bolyp keledi.
Esterińizge salaiyq, tuńǵysh Búkilqazaqstandyq respýblikalyq kórme 1926 jyly jáne Qazaqstan sýretshileriniń tuńǵysh kóshpeli kórmesi 1928 jyly Qyzylorda qalasynda ótken bolatyn.
2014 jyldyń qarasha aiynda aimaqta tarihi jáne mádeni mańyzy bar jergilikti eskertkish burynǵy oblystyq áskeri komitettiń ǵimaratynda kórkemsýret galereiasy ashylǵan bolatyn. Sodan beri galereiada jergilikti jáne syrttan keletin qylqalam sheberleriniń kórmeleri, beineleý óneri sabaqtary ótkizilip keledi.
