Aleksandr Zaichikov, Almas Óteshov, Dáýlet Niiazbekov jáne basqa da chempiondar oqyǵan Jalańtas Bahadúr atyndaǵy Qyzylorda oblystyq mamandandyrylǵan mektep-internatyna «Dene tárbiesi jáne sport» mamandyǵy boiynsha stýdentter daiarlaityn mektep-internat-kolledj mártebesi berildi.
Qyzylorda oblysynyń ákimi Qyrymbek Kósherbaev oqý ornynyń jumysymen tanysyp, ujymdy jańa oqý jylymen quttyqtady.
«2001 jyly Qyzylorda oblysynda sportta daryndy balalarǵa arnalǵan mektep-internat bolyp tuńǵysh ret ashylǵan búgingi mektep-internat-kolledjdiń tarihy tereń. Talai qazaq balasy bilim alyp, el igiligine qyzmet atqarýǵa ómirlik joldamamen attandy. Bilim men tárbie berý jolynda esimderi elge tanymal, Álem, Aziia chempiondary men Olimpiada júldegerleri túlep shyqty. Aýyr atletikadan Olimpiada oiyndarynyń qola júldegeri Aleksandr Zaichikov, Olimpiada oiyndarynyń qatysýshylary, Álem chempionatynyń kúmis júldegeri Almas Óteshov, erkin kúresten 3 dúrkin Aziia chempiony Dáýlet Niiazbekov, dziýdodan jasóspirimder Olimpiada oiyndarynyń chempiony, tuńǵysh Álem chempiony Baýyrjan Jaýyntaev, erkin kúresten Olimpiada oiyndarynyń qatysýshysy Ǵalymjan Óserbaev, aýyr atletikadan Álem chempionatynyń qatysýshysy Qýanysh Rahatov syndy sportshylarymyzdy maqtanyshpen aita alamyz. Igi bastamalaryńyzǵa shyǵarmashylyq tabys, jańa jetistikter men jeńister, pedagogikalyq izdenis, jańa serpin tileimin!»- dedi aimaq basshysy.
Mektep-internattyń 5 synybynda 200 oqýshy oqidy, al kolledjde «Dene tárbiesi jáne sport» mamandyǵy boiynsha 20 stýdent bilim alýda.
Biylǵy jyly oqý ornynda 8 QR sport sheberi, 38 sport sheberligine úmitker daiarlanyp, ulttyq quramanyń qataryna 31 oqýshy ótti. 2017-2018 oqý jylynda mektep-internat oqýshylary QR chempionattarynda 132 medal ielendi.Nurdáýlet Amanqosov pen Qundyz Jylqybai Aziia chempionatynyń kúmis júldegerleri atandy. Sondai-aq, mektep jáne kolledj oqýshylary arasyndaǵy QR 9-shy jazǵy spartakiadasynda mektep-internat oqýshylary 28 altyn, 14 kúmis, 15 qola júlde jeńip aldy.
Sonymen qatar, qazan aiynda Argentinanyń Býenos-Aires qalasynda ótetin III jazǵy jasóspirimder arasyndaǵy Olimpiada oiyndaryna mektep-internat oqýshylary Dias Bahradin, Elnýra Nýrlanova baidarka jáne kanoeden esý boiynsha, al Erasyl Ergenbai men Esengeldi Sápi aýyr atletikadan qatysady.
Aita keteiik, jyl basynan beri oblys sportshylary QR chempionatynda 1044 medal (350 altyn, 321 kúmis jáne 373 qola medal), Aziia jáne Álem chempionattarynda 80 medal (30 altyn, 29 kúmis, 21 qola) ielendi. Olardyń qatarynda 1 sportshy - Qazaqstannyń eńbek sińirgen jattyqtyrýshysy, 4 halyqaralyq dárejedegi sport sheberi, 40 sport sheberi, 878 sport sheberi kandidaty men 1-shi dárejeli sportshylar bar. Qazaqstan Respýblikasynyń qurama komandasyna aimaqtyń 470 sportshysy qosyldy.
