Qyzylorda oblysynda munai ónimderin zańsyz óńdegene, jáne ony satqan 48 jastaǵy jazalandy, dep habarlaidy "Ult aqparat".
Atalmysh qylmystyq is Qyzylorda oblysy boiynsha ekonomikalyq tergeý departamentiniń óndirisinde qaraldy. 48 jastaǵy er adam 2016 jyldan bastap kásipkerlikpen ainalysqan. Sol arqyly oblystaǵy munai kompaniialarymen munai basseinderin tazalaý, nefteshlamdardy shyǵarý jáne joiý qyzmetine bailanysty kelisimshart jasaǵan. Degenmen ýaqyt óte kele zańsyz áreketterge bet burǵan.
«Kelisimderdi paidalanyp, óńdelmegen munai ónimderin qyzdyryp, tundyrylǵan ónimdi iemdený jáne satý josparyn iske asyrǵan. Paida bolǵan ónimdi munai qaldyqtaryn tasymaldaýǵa arnalǵan kólik arqyly ken ornynan alyp shyǵyp otyrǵan. Onyń árbir tonnasy birneshe zańdy tulǵaǵa 110 myń teńgeden satylǵan», - dep málim etti Qyzylorda oblysy boiynsha ekonomikalyq tergeý departamenti.
Bul boiynsha QR Qylmystyq kodeksiniń 197-baby 3-bóligi, 18-babynyń 1-bóligimen qylmystyq is qozǵaldy. Onda munai jáne munai ónimderiniń shyǵarý zańdylyǵyn rastaityn qujatsyz tasymaldaǵany, iemdengeni, ótkizgeni, saqtaǵany, munaidy qaita óńdeý, qylmystyq jolmen túsken tabysty zańdy ainalymǵa tartyp, iemdenip jáne paidalaný jaǵdailary kórsetilgen.
Qyzylorda qalalyq №2 sotynyń úkimimen oǵan 1 jyl 6 aiǵa bas bostandyǵynan shekteý jazasy taǵaiyndaldy. Jaza merzimine probatsiialyq baqylaý belgilendi.
