Foto: Alina Týlebaeva/ Kazinform
Qyzylorda oblysynyń Jańaqorǵan aýdanynda mekteptiń bas esepshisi bolǵan Abzal Seidekovke qatysty qylmystyq is boiynsha sot úkimi shyqty. Ol qyzmet babyn paidalanyp, memlekettik mekeme qarjysyn qaltaǵa basqan. Bul týraly Qyzylorda oblysy boiynsha Ekonomikalyq tergep-tekserý departamentinen habarlady.
- Tergeý barysynda anyqtalǵandai, Abzal Seidekov 2023 jyldyń 1 qańtary men 2024 jyldyń 31 jeltoqsany aralyǵynda ózine senip tapsyrylǵan laýazymdyq mindetti teris maqsatqa paidalanyp, mektep qyzmetkerleriniń ailyq jalaqysyn esepteý kezinde únemdelgen qarajatty óz shotyna zańsyz aýdaryp otyrǵan. Jalpy somasy 36 million teńge kólemindegi qarajatty jymqyryp, ony «Pin Up» býkmekerlik qosymshasy arqyly qumar oiynǵa jumsaǵan. Alaida, tergeý barysynda keltirilgen zalal tolyǵymen óteldi, 36 million teńge biýdjetke qaitaryldy, - delingen habarlamada.
Mekteptiń burynǵy bas esepshisi Qylmystyq kodekstiń 189-babyniń 4-bóligi 2-tarmaǵy (senip tapsyrylǵan bóten múlikti iemdenip alý nemese ysyrap etý, asa iri mólsherde) boiynsha kináli dep tanylyp, sot úkimimen 7 jylǵa bas bostandyǵynan aiyryldy.
– Sonymen qatar 7 jyl merzimge esepshilik qyzmetpen ainalysý quqyǵynan aiyryldy. Sottalýshy jazasyn qylmystyq atqarý júiesiniń qaýipsizdigi ortasha mekemesinde óteidi, - delingen departament habarlamasynda.
Buǵan deiin biz Qarjylyq monitoring agenttigi jyl basynan beri 36 qarjy piramidasynyń qyzmetin toqtatqanyn jazǵanbyz.
